حکومت سندھ نے مون سون بارشوں کے دوران عوام کے جان و مال کے تحفظ کے لئے تیاریاں مکمل کر لی ہیں، شرجیل انعام میمن

لاڑکانہ (اُردو پوائنٹ اخبارتازہ ترین - اے پی پی۔ 20 جولائی2025ء) حکومت سندھ نے مون سون بارشوں کے دوران عوام کے جان و مال کے تحفظ کے لئے تیاریاں مکمل کر لی ہیں اور حکومت سندھ کی جانب سے بلدیاتی اداروں کے عملے کی چھٹیاں منسوخ کردی گئی ہیں۔سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ ڈپٹی کمشنرز اور بلدیاتی اداروں کے چیئرمینوں کو ہدایت دی گئی ہے کہ بارش کا پانی فوری طور پر نکالنے کے انتظامات کیے جائیں۔

ایک بیان میں انہوں نے کہا کہ حکومت سندھ نے مون سون بارشوں کے دوران شہریوں کے جان و مال کے تحفظ کے لیے ہنگامی اقدامات کئے ہیں۔ انہوں نے بتایا کہ ڈپٹی کمشنرز اور بلدیاتی اداروں کے چیئرمینوں کو ہدایت دی گئی ہے کہ بارش کا پانی فوری طور پر نکالنے کے انتظامات کیے جائیں، خاص طور پر نشیبی علاقوں میں ڈی واٹرنگ پمپس کی دستیابی ہر صورت یقینی بنائی جائے۔

(جاری ہے)

انہوں نے مزید کہا کہ بلدیاتی اداروں کے عملے کی چھٹیاں منسوخ کر دی گئی ہیں اور ان کی 24 گھنٹے موجودگی لازمی قرار دی گئی ہے تاکہ کسی بھی ہنگامی صورتحال میں فوری کارروائی کی جا سکے۔شرجیل انعام میمن نے بتایا کہ حکومت سندھ نے کراچی کے پرانے شہر میں 59 خطرناک عمارتوں کی نشاندہی کی ہے جن میں 10 عمارتیں قومی ورثہ قرار دی گئی ہیں۔ انہوں نے کہا کہ سندھ بلڈنگ کنٹرول اتھارٹی کی تکنیکی کمیٹی، جس میں ماہر اسٹرکچرل انجینئرز شامل ہیں، شہر بھر میں مسلسل سروے کر رہی ہے تاکہ مزید ایسی عمارتوں کا پتہ لگایا جا سکے جو شہریوں کے لیے خطرہ بن سکتی ہیں۔

اب تک 41 انتہائی خطرناک عمارتوں کو خالی کرا کے سیل کر دیا گیا ہے تاکہ انسانی جانوں کا تحفظ یقینی بنایا جا سکے۔انہوں نے بتایا کہ متوقع بارشوں کے پیش نظر ایس بی ڈی اے میں ایک رین ایمرجنسی سینٹر قائم کر دیا گیا ہے جو 24 گھنٹے تکنیکی عملے کے ساتھ فعال ہے۔ شہری کسی بھی ہنگامی صورتحال میں ایس بی سی اے کے نمبرز 99232355 اور 99230393 پر رابطہ کر سکتے ہیں یا SBCA کی ویب سائٹ www.sbca.gos.pk](http://www.sbca.gos.pk) کے ذریعے بھی مدد حاصل کر سکتے ہیں۔

شرجیل انعام میمن نے کہا کہ حکومت سندھ عوام کی سلامتی کو اولین ترجیح دے رہی ہے اور مون سون کے دوران کسی قسم کی کوتاہی برداشت نہیں کی جائے گی۔ انہوں نے شہریوں سے اپیل کی کہ وہ خطرناک عمارتوں سے فوری طور پر نکل آئیں اور حکومت کے ساتھ تعاون کریں تاکہ کسی بڑے نقصان سے بچا جا سکے۔