احسن اقبال کی زیرصدارت معرکۂ حق اور جشنِ آزادی 2025 کی تقریبات کے شایانِ شان انعقاد کیلئے اہم اجلاس

پیر 21 جولائی 2025 23:10

اسلام آباد (اُردو پوائنٹ اخبارتازہ ترین - اے پی پی۔ 21 جولائی2025ء) وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال کی زیر صدارت معرکۂ حق اور جشنِ آزادی 2025 کی تقریبات کے انتظامات سے متعلق اعلیٰ سطحی اجلاس منعقد ہوا۔ اجلاس میں وفاقی وزیر اطلاعات ونشریات عطا اللہ تارڑ، وزیر مملکت طلال چوہدری، متعلقہ وزارتوں، آئی ایس پی آر، صوبائی حکومتوں اور شراکت دار اداروں کے اعلیٰ افسران نے شرکت کی۔

اجلاس میں متعلقہ وزارتوں کے حکام نے معرکۂ حق اور جشنِ آزادی کے سلسلے میں اپنے مجوزہ منصوبہ جات اور اقدامات پر بریفنگ دی۔ وفاقی وزیر احسن اقبال نے ہدایت کی کہ ان تقریبات کو منفرد انداز میں جوش و خروش کے ساتھ منایا جائے تاکہ قومی جذبے اور یکجہتی کو مزید فروغ حاصل ہو۔

(جاری ہے)

وفاقی وزیر نے کہاکہ آپریشن بنیان مرصوص ہماری دفاعی خودمختاری کا منہ بولتا ثبوت ہے، اب وقت ہے کہ ملکی معیشت کو بھی ناقابلِ شکست بنایا جائے۔

انہوں نے اس عزم کا اعادہ کیا کہ یومِ آزادی اور معرکۂ حق کے ذریعے دنیا کو یہ پیغام دیں گے کہ پاکستان ترقی کی نئی بلندیوں کی جانب گامزن ہے۔پروفیسر احسن اقبال نے کہا کہ قوموں کی ترقی کا راز عزم، ہمت اور تنظیم میں پوشیدہ ہے اور یہی معرکۂ حق کا اصل پیغام ہے۔ انہوں نے زور دیا کہ ہر پاکستانی شہری کو اس قومی جدوجہد میں بھرپور کردار ادا کرنا ہوگا۔

اجلاس میں یہ بھی فیصلہ کیا گیا کہ بیرونِ ملک پاکستانی اور سفارتی مشنز جشنِ آزادی اور معرکۂ حق کی تقریبات کو دنیا بھر میں پاکستان کے مثبت تشخص کو اجاگر کرنے کے لیے استعمال کریں گے۔سفارتی مشنز کو ہدایت دی گئی کہ وہ طلبہ اور مقامی برادریوں کو ان تقریبات میں فعال شرکت کی ترغیب دیں۔ہائر ایجوکیشن کمیشن کو یونیورسٹی سطح پر مضمون نویسی، تقریری مقابلے اور آرٹ گیلریز کے انعقاد کی ہدایت کی گئی تاکہ نوجوانوں میں جشنِ آزادی کی اصل روح کو بیدار کیا جا سکے۔

تمام صوبائی حکومتیں تقریبات کی سیکورٹی کے لیے بھرپور اقدامات یقینی بنائیں۔وفاقی وزیر نے کہا کہ ہماری آزادی عظیم شہداء کی قربانیوں کی مرہونِ منت ہے، لہٰذا تقریبات میں انہیں بھرپور خراجِ عقیدت پیش کرنا ناگزیر ہے۔