بلوچستان میں غیرت کے نام پر دوہرے قتل کے المناک واقعہ پر پنجاب اسمبلی میں مذمتی قرارداد جمع

منگل 22 جولائی 2025 17:06

لاہور (اُردو پوائنٹ اخبارتازہ ترین - اے پی پی۔ 22 جولائی2025ء) بلوچستان میں غیرت کے نام پر دوہرے قتل کے المناک واقعہ پر پنجاب اسمبلی میں مذمتی قرارداد جمع کرا دی گئی۔ قرارداد استحکام پاکستان پارٹی کے رکن صوبائی اسمبلی شعیب صدیقی نے جمع کرائی، قرارداد میں ایسے جرائم کی روک تھام کے لیے موثر قانون سازی کا مطالبہ کیا گیا ہے۔ قرارداد کے متن میں کہا گیا کہ بلوچستان میں فرسودہ رسم و رواج کے نام پر سرعام گولیوں سے چھلنی کیا جانا انتہائی افسوسناک اور شرمناک ہے، جس نے ہر ذی شعور شہری کو جھنجھوڑ کر رکھ دیا ہے۔

(جاری ہے)

قرارداد میں کہا گیا کہ اپنا قانون اور عدالت لگانے والے گھنائونے جرائم میں ملوث کسی بھی شخص کو رعایت کا مستحق نہیں سمجھا جانا چاہیے۔ متن کے مطابق یہ واقعات قبائلی رسم و رواج کی پستی اور زمانہ جاہلیت کی عکاسی کرتے ہیں۔ ایوان نے ایسے تمام واقعات کی مذمت کرتے ہوئے مطالبہ کیا ہے کہ ملوث تمام کرداروں کو منظرعام پر لا کر ان کے خلاف سخت قانونی کارروائی کی جائے۔ قرارداد میں وفاقی اور صوبائی حکومتوں سے غیرت کے نام پر کاروکاری اور دیگر فرسودہ رسوم کے خاتمے کے لیے سخت سزائوں پر مبنی قانون سازی اور آئندہ ایسے واقعات کی روک تھام کے لیے موثر اقدامات کرنے کا بھی مطالبہ کیا گیا ۔