وزیراعلیٰ کی پولیس ٹریننگ کالج چوہنگ آمد،منشیات کے خاتمے کیلئے پنجاب کی پہلی کائونٹر نارکوٹکس فورس لانچ کر دی

لاہور (اُردو پوائنٹ اخبارتازہ ترین - این این آئی۔ 22 جولائی2025ء) وزیراعلیٰ مریم نوازشریف نے پولیس ٹریننگ کالج چوہنگ میں پنجاب کائونٹر نارکوٹکس فورس کی کمیشننگ تقریب میں خصوصی شرکت کی۔ وزیراعلیٰ مریم نواز شریف نے منشیات کے خاتمے کے لئے پنجاب کائونٹر نارکوٹکس فورس لانچ کر دی ۔ وزیر اعلیٰ مریم نواز شریف کو سی این ایف نے جنرل سلامی پیش کی۔

وزیر اعلیٰ مریم نواز شریف کی موجودگی میں کائونٹر نارکوٹکس فورس کے افسروں اور جوانوں نے حلف اٹھایا۔ وزیراعلیٰ مریم نواز شریف نے کائونٹر نارکوٹکس ٹریننگ میں بہترین پرفارمنس پر افسروں اور جوانوں میں انعامات تقسیم کئے۔ وزیر اعلیٰ مریم نواز شریف نے اے این ایف کے پرچم کو پنجاب کاونٹر نارکوٹکس فورس کے سپرد کیا۔ وزیراعلیٰ مریم نوازشریف نے کائونٹر نارکوٹکس فورس کے جوانوں سے ملاقات کی ۔

(جاری ہے)

وزیراعلیٰ مریم نواز شریف نے آلات، ٹیکنالوجی اور گاڑیوں کامعائنہ کیا اور پنجاب کاونٹر نارکوٹکس فورس کے قیام پر اطمینان کا اظہار کیا۔ وزیر اعلیٰ مریم نواز شریف کو ڈی جی سی این ایف برگیڈیر مظہر اقبال نے فورس کے بارے میں تفصیلی بریفنگ میں بتایا کہ پنجاب کائونٹر نارکوٹکس فورس کے لیے پہلے فیز میں866 آسامیوں پر بھرتیاں کی گئی ہیں۔

پنجاب کائونٹر نارکوٹکس فورس کو تمام ڈویژن میں فنکشنل کر دیا گیا۔ پہلے مرحلے میں پنجاب کی ہر ڈویژن میں سی این ایف کے سٹیشنز اور ریجنل ڈائریکٹوریٹس قائم ہوچکے ہیں۔ دوسرے مرحلے میں سی این ایف کا دائرہ کار ضلعی سطح تک بڑھایا جائے گا۔ سی این ایف کے افسران اور جوانوں کو اے این ایف اکیڈمی راولپنڈی میں 12 ہفتوں کی پروفیشنل تربیت دی گئی۔

بریفنگ میں مزید بتایا گیا کہ کائونٹر نارکوٹکس فورس کو جدید ہتھیار اور آپریشنل گاڑیاں فراہم کی گئی ہیں۔کائونٹر نارکوٹکس فورس کے ڈی جی این سی کے دفتر کے لئے چار منزلہ عمارت فراہم کی گئی۔ پنجاب کائونٹر نارکوٹکس فورس کے قیام کے لئے 2.33 ارب روپے مختص کیے گئے۔ کائونٹر نارکوٹکس فورس پنجاب کی جیلوں اور تعلیمی اداروں میں منشیات کے خاتمے کے لئے کام کرے گی۔

پنجاب کی تمام ڈویژنز کی سی این ایف فورس کے دستوں نے ترانوں کی گونج میں مارچ پاسٹ کیا۔ وزیر اعلیٰ مریم نواز شریف نے سی این ایف لیڈیز سٹاف کا مارچ پاسٹ دیکھ کر مسرت کا اظہار کیا۔ تقریب میں سی این ایف بینڈ نے دل دل پاکستان ملی نغمہ پیش کیا۔ وزیر اعلیٰ مریم نواز شریف نے بینڈ کو انعامات سے نوازا۔ بعد ازاںوزیر اعلیٰ مریم نواز شریف نے سی این ایف افسروں اور جوانوں کے ساتھ گروپ تصاویر بھی بنوائیں۔