کوئی دن آسان نہیں‘ تحریک انصاف نظریے کی قیمت چکا رہی ہے،زرتاج گل

منگل 22 جولائی 2025 21:06

اسلام آباد (اُردو پوائنٹ اخبارتازہ ترین - آن لائن۔ 22 جولائی2025ء) پاکستان تحریک انصاف (پی ٹی آئی) کی مرکزی رہنما زرتاج گل نے کہا ہے کہ تحریک انصاف کے کارکنان اور قیادت ہر روز عدالتوں میں پیش ہو رہی ہے جبکہ بانی پی ٹی آئی ملک میں رہ کر اپنے خلاف مقدمات کا سامنا کر رہے ہیں، وہ نواز شریف یا آصف زرداری کی طرح بیرون ملک نہیں بھاگے۔ جوڈیشل کمپلیکس میں میڈیا سے گفتگو کرتے ہوے انہوں نے کہا کہ پی ٹی آئی ایک نظریاتی جماعت ہے، کوئی خاندانی سیاسی ڈھانچہ نہیں، یہاں فیصلے بانی پی ٹی آئی ہی کرتے ہیں، جنہیں قیادت، کارکنان اور وکلاء مکمل طور پر تسلیم کرتے ہیں۔

انہوں نے عدالتوں کے رویے پر سوال اٹھاتے ہوئے کہا کہ عدالتوں میں صرف تحریک انصاف کے رہنما، وکلا اور کارکنان کے کیسز پر توجہ دی جا رہی ہے، جبکہ دیگر جماعتوں کو استثنیٰ حاصل ہے۔

(جاری ہے)

انہوں نے کہا کہ 9 مئی کے بعد تحریک انصاف کے لیے کوئی دن آسان نہیں رہا، کارکنان پر گولیاں چلائی گئیں، اور الٹا انہی پر مقدمات قائم کر دیے گئے۔ سوال کرنا ہر کارکن کا حق ہے، مگر ہم سے یہ حق بھی چھینا جا رہا ہے۔

انہوں نے جیل میں بانی پی ٹی آئی سے ملاقات نہ ہونے پر شکوہ کرتے ہوئے کہا کہ مجھے بانی پی ٹی آئی سے ملاقات کی اجازت نہیں دی جاتی، حالانکہ جیل ٹرائل کے دوران مکمل ملاقات کی اجازت ہونی چاہیے۔ زرتاج گل نے مطالبہ کیا کہ انسدادِ دہشت گردی عدالت میں بانی پی ٹی آئی کو پیش کیا جائے اور ان کی جانب سے دی گئی ملاقات کی فہرست میں شامل افراد کو ان سے ملاقات کی اجازت دی جائے۔انہوں نے کہا کہ بانی پی ٹی آئی اور بشریٰ بی بی اس وقت سب سے بڑی آزمائش سے گزر رہے ہیں، لیکن ہم ہر مشکل میں ان کے ساتھ کھڑے ہیں۔