Live Updates

پی ڈی ایم اے پنجاب نے مون سون اور فلڈ فیکٹ شیٹ جاری کردی

منگل 22 جولائی 2025 22:42

اسلام آباد (اُردو پوائنٹ اخبارتازہ ترین - این این آئی۔ 22 جولائی2025ء)پرووینشل ڈیزاسٹر مینجمنٹ اتھارٹی (پی ڈی ایم ای) پنجاب نے صوبے میں مون سون اور فلڈ فیکٹ شیٹ جاری کردی فیکٹ شیٹ کے مطابق 25 جولائی تک بہاولپور، ڈیرہ غازی خان، فیصل آباد، گجرات، گوجرانوالا، لاہور، ملتان، راولپنڈی، ساہیوال اور سرگودھا ڈویڑنز میں بارشوں کی پیشگوئی کی گئی ہے۔

22 سے 24 جولائی تک دریاؤں میں پانی کے بہاؤ میں اضافے کا خدشہ ہے۔

(جاری ہے)

فیکٹ شیٹ کے مطابق رواں سال مون سون بارشوں کے باعث صوبے میں135 شہری جاں بحق، 479 زخمی اور 156 گھر متاثر ہوئے جبکہ زیادہ اموات بوسیدہ مکانات گرنے سے ہوئیں۔آسمانی بجلی گرنے، کرنٹ لگنے اور ڈوبنے سے بھی اموات رپورٹ ہوئیں۔فیکٹ شیٹ میں کہا گیا کہ گزشتہ 24 گھنٹوں کے دوران نارووال میں 62، راولپنڈی54، مری 42، جہلم 7 اور سیالکوٹ میں6 ملی میٹر بارش ہوئی، منگلا ڈیم میں 50 فیصد جبکہ تربیلا میں 79 فیصد پانی موجود ہے۔ دریائے سندھ میں تربیلا، کالا باغ، چشمہ اور تونسہ کے مقامات پر نچلے درجے کا سیلاب ہے، ممکنہ سیلابی خطرے کے پیشِ نظر پی ڈی ایم اے کے انتظامات مکمل ہیں۔