Live Updates

محسن نقوی کے دور میں ایک اور شرمناک ریکارڈ پاکستان کرکٹ کے نام

پاکستان ایک سال کے دوران سب سے زیادہ ٹی ٹوئنٹی میچز ہارنے والی ٹیم بن گئی

محمد علی بدھ 23 جولائی 2025 20:21

لاہور (اُردو پوائنٹ اخبارتازہ ترین۔ 23 جولائی2025ء) محسن نقوی کے دور میں ایک اور شرمناک ریکارڈ پاکستان کرکٹ کے نام، پاکستان ایک سال کے دوران سب سے زیادہ ٹی ٹوئنٹی میچز ہارنے والی ٹیم بن گئی۔ تفصیلات کے مطابق چئیرمین پی سی بی محسن نقوی کی جانب سے کرکٹ بورڈ میں آمد کے بعد سے پاکستان کی کرکٹ نے زوال کی نئی تاریخ رقم کر دی ہے۔ محسن نقوی کے چئیرمین پی سی بی بننے کے بعد سے پاکستان کرکٹ ٹیم کی شرمناک شکستوں اور شرمناک ریکارڈز بننے کا سلسلہ رکنے کا نام نہیں لے رہا۔

سامنے آنے والے تازہ ترین اعداد و شمار کے مطابق 2024 سے اب تک کھیلے گئے بین الاقوامی ٹی ٹوئنٹی میچز میں پاکستان کرکٹ ٹیم کا دنیا میں سب سے بدترین ریکارڈ رہا ہے۔ پاکستان نے گزشتہ ایک سال کے دوران 63 ٹی ٹوئنٹی میچز کھیلے جن میں سے اسے 38 میں شکست ہوئی۔

(جاری ہے)

گزشتہ ایک سال کے دوران کسی دوسری ٹیم کو اتنے ٹی ٹوئنٹی میچز میں شکست نہیں ہوئی۔ واضح رہے کہ محسن نقوی دور میں پاکستان کرکٹ ٹیم کی شرمناک شکستوں کا ریکارڈ بن چکا ہے۔

محسن نقوی کے چئیرمین پی سی بی بننے کے بعد پاکستان ٹی ٹوئنٹی ورلڈکپ میں امریکا سے شکست کھا چکا، آئرلینڈ کے ہاتھوں بھی پاکستان کو شکست ہو چکی، پاکستان ہوم گراونڈ پر کمزور ویسٹ انڈیز کیخلاف ٹیسٹ سیریز جیتنے میں بھی ناکام رہا، جبکہ ورلڈکپ ٹیسٹ چیمپئن شپ میں پاکستان کو آخری نمبر ملا۔ اس کے علاوہ صرف ایک سال میں پاکستان کو بنگلہ دیش کے ہاتھوں ٹیسٹ سیریز میں وائٹ واش کا سامنا کرنے کے بعد ٹی ٹوئنٹی سیریز میں بھی شکست ہو گئی۔