لاہور پولیس گارڈ کی ارفع کریم ٹاور پرانی سبزی منڈی خودکش حملے کے شہدا کی قبور پر حاضری،سلامی پیش کی

جمعرات 24 جولائی 2025 16:27

لاہور (اُردو پوائنٹ اخبارتازہ ترین - اے پی پی۔ 24 جولائی2025ء) ارفع کریم ٹاور پرانی سبزی منڈی خودکش حملے کے شہدا کی8ویں برسی پرلاہور پولیس کی جانب سے انہیں خراج ِ عقیدت پیش کیا گیا۔ترجمان کے مطابق پولیس گارڈ نے سب انسپکٹر ریاض احمد، کانسٹیبل عمیر غنی،ساجد علی،معظم علی، غلام مرتضیٰ، علی رضا اور کانسٹیبل عابد علی کی قبور پر حاضری دی۔

(جاری ہے)

پولیس کے چاق و چوبند دستے نے شہدا کوسلامی پیش کی، پھولوں کی چادر چڑھائی اور فاتحہ خوانی کی ،فرض کی راہ میں جام ِ شہادت نوش کرنے والے شہدائے پولیس کی لازوال قربانیوں کو خراج عقیدت پیش کیا گیا، اس موقع پر شہدا کے اہل خانہ بھی موجود تھے۔

سی سی پی او بلال صدیق کمیانہ نے اس موقع پر کہا کہ لاہور پولیس کی تاریخ فرض کی راہ میں جانیں قربان کرنے والے جانثاروں سے بھری پڑی ہے،342 افسران و اہلکاروں نے فرض کی راہ میں اپنی جانیں نچھاور کیں، پاکستان کے قیام، بقا و سا لمیت میں شہدا اور غازیوں کا لہو شامل ہے۔یا د رہے کہ 24جولائی2017 کو بزدل دہشت گردوں نے ارفع کریم ٹاور پرانی سبزی منڈی میں ڈیوٹی پر مامورجوانوں پر خودکش حملہ کیا جس کے نتیجے میں لاہور پولیس کے یہ جانباز شہادت کے منصب پر فائز ہوئے۔