پاکستان کی قومی اسمبلی کے ینگ پارلیمنٹرینز فورم کے ایک وفد نے مشترکہ طور پر صدر ینگ پارلیمنٹرینز فورم کی قیادت میں گورنر بلوچستان سے ملاقات

کوئٹہ (اُردو پوائنٹ اخبارتازہ ترین - اے پی پی۔ 24 جولائی2025ء) پاکستان کی قومی اسمبلی کے ینگ پارلیمنٹرینز فورم ( وائی پی ایف ) کے ایک وفد نے مشترکہ طور پر صدر ینگ پارلیمنٹرینز فورم سیدہ نوشین افتخار اور جنرل سیکرٹری وائی پی ایف نوابزادہ میر جمال خان رئیسانی کی قیادت میں گورنر بلوچستان جعفر خان مندوخیل سے صوبے کے سرکاری دورے کے دوران ملاقات کی۔

وفد میں ایم این اے محمد سعد اللہ، محمد مقداد علی خان، راجہ اسامہ سرور، اختر بی بی، شائستہ خان، محمد عثمان بادینی اور راجہ محمد علی شامل تھے۔صدر وائی پی ایف سیدہ نوشین افتخار نے ینگ پارلیمنٹرینز فورم کا ایک جامع جائزہ پیش کیا جس میں جمہوری شراکت داری، جامع پالیسی سازی اور قومی گفتگو میں نوجوانوں کی زیادہ سے زیادہ شرکت کو فروغ دینے کے مشن کی وضاحت کی۔

(جاری ہے)

انہوں نے خاص طور پر بلوچستان میں خواتین کی بہتر نمائندگی کو یقینی بنانے کی اہمیت پر زور دیا، اس بات پر زور دیا کہ نوجوان خواتین کو بااختیار بنانا اور صنفی شمولیت کو فروغ دینا فورم کے مقاصد میں کلیدی حیثیت رکھتا ہے۔نوابزادہ میر جمال خان رئیسانی، ایم این اے نے ینگ پارلیمنٹرینز فورم اور بلوچستان بھر کی یونیورسٹیوں کے درمیان باضابطہ تعاون قائم کرنے کی تجویز پیش کی تاکہ علمی اور قانون سازی کیلئے ایک پائیدار پلیٹ فارم بنایا جا سکے۔

انہوں نے اس بات پر زور دیا کہ اسطرح کی شراکت داری پالیسی ساز اداروں اور صوبے کے نوجوانوں بالخصوص طلباء اور ابھرتے ہوئے لیڈروں کے درمیان خلیج کو ختم کرنے میں مدد دیگی۔اس موقع پر گورنر جعفر خان مندوخیل نے اس اقدام کو سراہا اور یونیورسٹی کے روابط کے خیال کا خیرمقدم کیا۔ انہوں نے وفد کو بتایا کہ بلوچستان میں پبلک سیکٹر کی 12 یونیورسٹیاں ہیں اور انہوں نے یقین دلایا کہ ان کا دفتر اس سلسلے میں وائی پی ایف کو ہر ممکن تعاون فراہم کریگا۔

گورنر نے مزید ریمارکس دیے کہ موثر قانون سازی اور عوامی پالیسیوں کی تشکیل کیلئے نوجوانوں کی رائے ضروری ہے اور یہ کہ بامعنی مشغولیت کافی اور جامع ترقی کا باعث بن سکتی ہے۔ انہوں نے وائی پی ایف کی کراس پارٹی نوعیت اور نوجوان قانون سازوں کو سیاسی وابستگیوں سے بالاتر ہو کر وسیع تر قومی مفاد کیلئے متحد کرنے کے عزم کی بھی تعریف کی۔ انہوں نے بلوچستان میں چیلنجز اور مواقع کی طرف قومی توجہ دلانے میں فورم کے اقدامات کی قدر کا بھی اعتراف کیا۔

نوابزادہ میر جمال خان رئیسانی نے گورنر کو پہلی بار صوبائی سطح پر وائی پی ایف چیپٹرز کی تشکیل کیلئے فورم کی جاری کوششوں سے آگاہ کیا اور کہا کہ ان کا دورہ بلوچستان اس سلسلے میں ایک اہم سنگ میل ہے۔ انہوں نے نوجوانوں پر مبنی پالیسی سازی اور قومی ہم آہنگی کو فروغ دینے کے فورم کے عزم کا اعادہ کیا۔ ملاقات کا اختتام باہمی افہام و تفہیم کے ساتھ ہوا جسکا مقصد نوجوانوں بالخصوص خواتین کو بااختیار بنانا اور بلوچستان میں تعلیمی اور سیاسی مصروفیات کے ذریعے جمہوری اقدار کو مستحکم کرنا ہے۔