سردار عتیق احمد خان کی قیادت میں کاروانِ مسلم کانفرنس مضبوط ہونے لگی

مظفرآباد/موہڑہ سنگڑھ (اُردو پوائنٹ اخبارتازہ ترین - این این آئی۔ 27 جولائی2025ء)آزاد کشمیر کی سیاست میں ایک بڑی پیش رفت، سنگڑھ بٹھارہ کے علاقے موہڑہ سنگڑھ میں مسلم کانفرنس کی مقبولیت میں شاندار اضافہ، مسلم لیگ (ن) اور پاکستان تحریک انصاف سے وابستہ اہم کارکنان و نوجوان رہنماوں نے اپنے اپنے سیاسی کیریئر کا نیا باب مسلم کانفرنس کے پلیٹ فارم سے شروع کر دیا۔

اس موقع پر صدر مسلم کانفرنس و سابق وزیراعظم آزادکشمیر سردار عتیق احمد خان خصوصی طور پر موہڑہ سنگڑھ پہنچے، جہاں انہوں نے شمولیت اختیار کرنے والے کارکنان کو خوش آمدید کہا اور نئے شامل ہونے والوں کو ہار پہنا کر ان کی شمولیت کا خیر مقدم کیا۔ مسلم کانفرنس تحریک آزادی اور تکمیل پاکستان کیلئے بھرپور جدوجہد کررہی ہے۔

(جاری ہے)

اس وقت کشمیری عوام تکمیل پاکستان کی جنگ لڑرہے ہیں اور اس مقصد کے حصول کیلئے لاکھوں کشمیری اپنی جانوں کے نذرانے پیش کرچکے ہیں اور وہ وقت دورنہیں جب کشمیریوں کی دی ہوئی قربانیاں رنگ لائیں گے اور شہداء کا خون کسی صورت رائیگاں نہیں جائے گا۔

مسلم کانفرنس کشمیریوں کی بھرپور حمایت جاری رکھے گی۔مسلم کانفرنس میں شمولیت اختیار کرنے والوں میں سردار یاسین عباسی، اصغر عباسی، صابر عباسی، خاقان اصغر عباسی، بشارت علی خان، محمد صیاد خان، روحیل عباسی، نسیم عباسی، وسیم نسیم، صادق خان، یاسر ممتاز، وسیم شاہ، حارث منشاد، نعیم چشتی، ابرار آزاد، محمد آزاد، ممتاز خان، کاشف رضا، ادریس عباسی، فیصل ظہور، نزاکت حسین، محمود عباسی، آشیر ستار، عطاء المصطفیٰ، دانش صیاد، مختیار یونس عباسی، عرفان یوسف، شہریار ارشاد سمیت درجنوں دیگر نوجوان و بزرگ سیاسی کارکن شامل ہیں۔

اس موقع پر عوامی اجتماع سے خطاب کرتے ہوئے سردار عتیق احمد خان نے کہا کہ مسلم کانفرنس عوامی امنگوں کی ترجمان جماعت ہے، جس کا دامن ہمیشہ نظریاتی سیاست، تحریکِ آزادی کشمیر اور عوامی خدمت سے وابستہ رہا ہے۔ انہوں نے کہا کہ مسلم کانفرنس نے ہمیشہ مشکل حالات میں بھی اپنے کارکنان اور نظریات کا ساتھ نہیں چھوڑا۔ موہڑہ سنگڑھ میں اتنی بڑی تعداد میں باشعور کارکنان کا مسلم کانفرنس میں شامل ہونا اس بات کا ثبوت ہے کہ عوام اب دوبارہ نظریاتی سیاست کی طرف لوٹ رہے ہیں۔

انہوں نے نوجوانوں کو مخاطب کرتے ہوئے کہا کہ مسلم کانفرنس نوجوانوں کی جماعت ہے، ہم نوجوان قیادت کو سامنے لائیں گے اور تحریک آزادی کشمیر کی قیادت ان کے ہاتھوں میں دیں گے۔تقریب کے آخر میں شمولیت اختیار کرنے والے تمام کارکنان نے سردار عتیق احمد خان کی قیادت پر بھرپور اعتماد کا اظہار کرتے ہوئے کہا کہ وہ مجاہد اول کے پیغام کو ہر گلی، محلے اور گائوں تک پہنچائیں گے۔

یاد رہے کہ مسلم کانفرنس حالیہ مہینوں میں آزادکشمیر کے مختلف علاقوں میں عوامی رابطہ مہم تیز کر چکی ہے، اور عوام کی بڑی تعداد دوبارہ اس جماعت کی جانب متوجہ ہو رہی ہے، جسے ریاست جموں و کشمیر کی مادر جماعت ہونے کا اعزاز حاصل ہے۔صدرمسلم کانفرنس نے نئے شامل ہونے والوں کو خوش آمدید کہتے ہوئے انہیں یقین دلاتے ہیں کہ ان کو جماعت میں جائز مقام دینگے۔

مسلم کانفرنس کارکنان کی محرومیوں کے ازالے کیلئے اپنا کردار ادا کررہی ہے۔ مسلم کانفرنس نے ہمیشہ کارکنوں کو عزت دی ہمارے لیے کارکنان کی عزت سب سے مقدم ہے۔کسی کو بھی مایوس نہیں کرینگے۔ انہوں نے کہا کہ مسلم کانفرنس حال ماضی اور مستقبل کی جماعت ہے مشکل وقت ہر جماعت پر آیا ہے اور وہ کارکن جو مشکل وقت میں بھی جواں مردی کے ساتھ کھڑے رہے وہ جماعت کاقیمتی اثاثہ ہوتے ہیں۔مشکل وقت ہر جماعت پرآتا ہے کارکنان اپنی صفوں میں اتحاد برقرار رکھیں۔ ریاست کے اندر مستقبل ریاستی جماعت کا ہے۔غیر ریاستی جماعتوں نے تحریک آزادی کشمیر کو ناقابل تلافی نقصان پہنچایا ہے۔