عالمی بینک کے اعلی سطحی وفد کاییلو لائن بی آر ٹی منصوبے کے سائٹ آفس اور جام صادق پل کے قریب جاری تعمیراتی کام کا تفصیلی دورہ

کراچی(اُردو پوائنٹ اخبارتازہ ترین - این این آئی۔ 27 جولائی2025ء)عالمی بینک کے اعلی سطحی وفد نے ییلو لائن بی آر ٹی منصوبے کے سائٹ آفس اور جام صادق پل کے قریب جاری تعمیراتی کام کا تفصیلی دورہ کیا۔سینئر وزیرشرجیل انعام میمن، سیکرٹری ٹرانسپورٹ اسد ضامن اور ایم ڈی سندھ ماس ٹرانزٹ اتھارٹی کمال دایو نے وفد کا استقبال کیا۔سائٹ آفس آمد پر اعلی سطح کا اجلاس منعقد کیاگیا،سینئر وزیر شرجیل انعام میمن نے وفد کو ییلو لائن بی آر ٹی کے حوالے سے تفصیلی بریفنگ دی۔

اجلاس کے موقع پر سینئروزیر شرجیل انعام میمن نے ییلو لائن بی آر ٹی منصوبے کی افادیت، اہمیت اور پیشرفت پر روشنی ڈالی۔اس موقع پر شرجیل انعام میمن نے کہاکہ ییلو لائن بی آر ٹی کراچی کا ایک اسٹریٹیجک اور وژنری منصوبہ ہے، جس کا مقصد عوام کو تیز، سستی اور محفوظ سفری سہولت دینا ہے،یہ منصوبہ شاہراہِ نورجہاں سے کورنگی انڈسٹریل ایریا اور لانڈھی تک محیط ہوگا، روزانہ لاکھوں افراد مستفید ہوں گے۔

(جاری ہے)

انہوں نے کہاکہ ییلو لائن نہ صرف شہریوں کی نقل و حرکت کو بہتر بنائے گی بلکہ معاشی سرگرمیوں کو بھی فروغ دے گی۔ہم چاہتے ہیں کہ منصوبہ عالمی معیار کے مطابق مکمل ہو۔ اس میں سہولتوں کو عالمی شہروں جیسا بنایا جا رہا ہے۔ہم چاہتے ہیں کہ یلو لائن بی آر ٹی میں صرف الیکٹرک بسیں چلیں تاکہ یہ منصوبہ مکمل طور پر ماحول دوست ہو۔انہوں نے کہاکہ ہم نے پاکستان میں پہلی بار ای وی بسیں اور خواتین کے لیے پنک بس سروس متعارف کروائی، جو اب کامیابی سے چل رہی ہیں۔

ایک وی بسوں سے ماحولیاتی آلودگی میں کمی آئے گی، فیول اخراجات میں بھی خاطر خواہ بچت ہو گی۔سینئروزیرنے کہاکہ ہم خواتین کو بااختیار بنانے کے لیے ایک وی اسکوٹر اسکیم لا رہے ہیں۔ اب تک 8 ہزار سے زائد خواتین نے درخواست دی ہے۔ایک فوڈ چین کمپنی بھی تربیت میں ہمارے ساتھ کام کر رہی ہے تاکہ خواتین کو مکمل طور پر تیار کیا جائے۔یہ صرف ٹرانسپورٹ نہیں، یہ سماجی انقلاب کی بنیاد ہے۔

شرجیل انعام میمن نے کہاکہ کراچی سرکلر ریلوے اور کراچی تا سکھر ہائی اسپیڈ ریل منصوبے پر بھی کام جاری ہے۔سرمایہ کاری کے فروغ کے لیے ہم نے اسپیشل اکنامک زونز قائم کیے ہیں جہاں سرمایہ کاروں کو دس سال تک ٹیکس چھوٹ دی گئی ہے۔انہوں نے کہاکہ ڈالر کی قدر میں اضافے کی وجہ سے تعمیراتی لاگت میں فرق ضرور آیا ہے، لیکن حکومت اس چیلنج سے نمٹنے کے لیے پرعزم ہے۔

اس موقع پرورلڈ بینک کے وفد نے ییلو لائن بی آر ٹی منصوبے کی رفتار، معیار اور وژن کو سراہا، کراچی جیسے بڑے شہر میں مزید ٹرانسپورٹ منصوبوں کی ضرورت پر زور دیا۔وفد نے پبلک پرائیویٹ پارٹنرشپ ماڈل پر بھی دلچسپی کا اظہارکرتے ہوئے حکومت سندھ کے اقدامات کو مثبت قرار دیا۔وفد نے جام صادق پل کے قریب ییلو لائن بی آر ٹی کے جاری تعمیراتی کام کا دورہ کیا، سینئر وزیر شرجیل انعام میمن نے وفد کو منصوبے کے مختلف پہلوئوں پر بریفنگ دی۔

ملاقات کے موقع پر سینئر وزیر شرجیل انعام میمن نے معزز مہمانوں کو شیلڈز اور سندھی ثقافت اجرک اور ٹوپی کے تحائف بھی پیش کئے۔ورلڈ بینک کے وفد میں ریجنل وائس پریزیڈنٹ مسٹر عثمان دیونی، کنٹری ڈائریکٹر برائے پاکستان بولورما آمنگابازار، ریجنل پریکٹس ڈائریکٹر فادیہ سعادہ، ریجنل پریکٹس ڈائریکٹر المود ویٹز، آپریشنز مینیجر گیلیوس ڈراوگیلس، اسپیشل اسسٹنٹ ٹو ریجنل وائس پریزیڈنٹ لوبنا حاجی، آپریشنز آفیسر حنا سلیم لوٹیا، اور سینئر ایگزیکٹو اسسٹنٹ مسٹر ولید انور شامل تھے