اسلام آباد (اُردو پوائنٹ اخبارتازہ ترین - اے پی پی۔ 28 جولائی2025ء) پاکستان ایئرپورٹس اتھارٹی (پی اے اے) اور پاکستان انٹرنیشنل ایئرلائن (پی آئی اے) نے حالیہ مہینوں میں بین الاقوامی معیارات پر پورا اترتے ہوئے متعدد اہم کامیابیاں حاصل کی ہیں۔ یورپ کے لیے پروازوں کی بحالی، حج آپریشنز کی کامیاب تکمیل، ہوائی اڈوں کی جدید کاری، اور سلامتی کے اقدامات پر پاکستان کو بھرپور پزیرائی ملی ہے ۔
پی آئی اے کے ترجمان عبداللہ حفیظ خان نے یورپ سے پابندی ختم ہونے کے بعد یہ خوشخبری سنائی کہ قومی ایئر لائن جسے پاکستان کی ایوی ایشن صنعت کی چند صف اول ایئر لائنز میں شمار کیا جاتا تھا ،گزشتہ دور حکومت کے ایک سابق وفاقی وزیر ہوابازی کے ایک بیان نے اس کی دہائیوں سے بنی ساکھ کو زمین بوس کر دیا۔
(جاری ہے)
بین الاقوامی ایئر سیفٹی ادارے کی جانب سے نہ صرف پی آئی اے پر سفری پابندیاں عائد کر دیں بلکہ غیر ملکی ایئرلائنز نے پاکستانی ہوابازوں کو ملازمتوں سے برخاست کر دیا ۔
یورپ ، امریکا اور برطانیہ کے فضائی روٹس بند ہونے سے پی آئی اے اور قومی وقار اور تشخص کو شدید دھچکا لگا ، لیکن معیارات کو عالمی تقاضوں کے ہم پلہ لانے کے لئے پاکستانی سول ایوی ایشن، ایئر پورٹ اتھارٹی اور ایئر لائن کے خصوصی اقدامات کی وجہ سے یہ فرانس کے بعد یورپی ایئر سیفٹی کے اداروں نے خصوصی آڈٹ کے بعد یہ پابندیاں ختم کر دی ہیں اور پاکستان انٹرنیشنل ایئر لائن اور نجی ایئر لائنز کو بھی پورپ کے لئے پروازوں کی اجازت مل گئی ہے۔
یورپ فلائٹ آپریشنز کی تیاریاں مکمل ہیں۔ یورپی ایوی ایشن سیفٹی ایجنسی (ای اے ایس اے) اور برطانیہ نے پی آئی اے پر سے پابندیاں اٹھا لی ہیں، جو چار سال کے بعد ایک اہم پیش رفت ہے۔ پی آئی اے نے اسلام آباد سے مانچسٹر کے لیے ہفتہ وار 4 پروازیں بحال کرنے کا اعلان کیا ہے ۔ پی آئی اے کا ایک اعلیٰ سطحی وفد مانچسٹر پہنچ چکا ہے تاکہ پروازوں کے انتظامات کا جائزہ لے سکے اور مانچسٹر سے اسلام آباد کی پروازیں اگست 2025 سے شروع ہوں گی۔
ابتدائی طور پر 14 اگست سے پروازیں شروع کرنے کا منصوبہ ہے ۔ یورپی منڈی میں واپس ہو گئی ہے پی آئی اے اب پیرس کے بعد میلان، بارسلونا، اور دیگر یورپی شہروں کے لیے بھی پروازیں بحال کرنے کی تیاری کر رہی ہے ۔ حالیہ کشیدگی کے دوران پی آئی اے نے بعد از حج آپریشن خصوصی پروازوں کے ذریعے کامیابی سے مکمل کیا اور زائرین کی اربعین سے بحفاظت واپسی کا قومی فریضہ سر انجام دیا۔
بیرون ملک مشکل میں پھنسے ہم وطنوں کی وطن واپسی قومی ایئرلائن کی سابقہ روایت رہی ہے، ہزاروں حجاج کو بحفاظت وطن منتقل کیا گیا۔ اس عمل میں کوئی بڑا خلل نہیں آیا، حجاج کے لیے روڈ ٹو مکہ سہولت کے زریعے طویل انتظار اور فلائٹس کی تاخیر پر قابو پانے میں مدد ملی۔جہاں قومی ایئرلائن کی فضائی سیفٹی اقدامات میں نمایاں بہتری آئی ہے وہاں پاکستان ایئرپورٹ اتھارٹی کی ہوائی اڈوں کو جدید بنانے اور انفراسٹرکچر کی ترقی کے لئے اقدامات ترجیح رہی ہے۔
اس سلسلے میں علامہ اقبال ایئرپورٹ کی اپ گریڈیشن ،ٹیکسی ویز "P" اور "R" کی بحالی کے ساتھ ساتھ نئے ایگزیکٹو لاؤنجز کی تعمیر کا کام تیزی سے جاری ہے۔ ایئر پورٹ 5.0 ماڈل مصنوعی ذہانت (اے آئی) اور خودکار نظاموں کو متعارف کرانے کی تیاریاں ہو رہی ہیں ۔ کوئٹہ ایئرپورٹ کی بین الاقوامی پزیرائی ملی ہے۔ کوئٹہ رن وے کی تعمیر نو کو ایشیا پیسیفک انجینئرنگ ایکسی لنس ایوارڈ ( ایف آئی ڈی آئی سی) سے نوازا گیا ہےجسے جنوبی افریقہ اور فرانس میں کیس اسٹڈی کے طور پر پیش کیا جائے گا ۔
ایک معاہدے کے تحت ایئر عربیہ کی نئی پروازیں ابوظہبی سے سیالکوٹ کے لیے براہ راست شروع کی گئی اور اب پی آئی اے نے ریاض سے سیالکوٹ اور ملتان کے لیے اپنی پروازیں شروع کر نے کا فیصلہ کیا ہے، پاکستان انٹرنیشنل ایئر لائنز (پی آئی اے)نے ریاض، سعودی عرب سے پاکستان کے دو اہم شہروں کے لیے ہفتہ وار پروازوں کا اگست سے آغاز ہو گا۔ پی آئی اے حکام نے اے پی پی کو بتایا کہ ریاض سے سیالکوٹ فلائٹ آپریشن 5 اگست سے جبکہ ریاض سے ملتان 8 اگست سے شروع ہو گا جس کے لئے بکنگ کا آغاز کردیا گیا ہے۔
اس اقدام سے کاروباری مسافروں اور تارکین وطن پاکستانیوں کو سہولت کا ملی ہے۔سلامتی کے اقدامات اور بین الاقوامی معیارات کے تحت رن وے سیفٹی کا جائزہ لیا جا رہا ہے۔ حال ہی میں باچا خان ایئر پورٹ پر رن وے سیفٹی ٹیم (آر ایس ٹی) کا اجلاس منعقد کیا گیا، جس میں پرندوں سے خطرات، رن وے انکروژن، اور دیگر حفاظتی مسائل پر تبادلہ خیال کیا گیا ۔
پاکستان ایئر پورٹس اتھارٹی کے ترجمان نے اے پی پی کے ساتھ گفتگو کرتے ہوئے کہا کہ فائر ایمرجنسی اینڈ ریسکیو مشقوں کے انعقاد کا بھی سلسلہ جاری ہے، تاکہ کسی بھی ممکنہ صورت حال سے نمٹنے کے لئے ہوائی اڈوں کے عملہ کی صلاحیتوں کو بڑھایا جا سکے اور تیاریوں کا جائزہ لیا جا سکے۔گوادر اور سکردو ایئرپورٹس پر رات کے وقت کی گئی مشقوں میں ہنگامی ردعمل کی صلاحیتوں کو جانچا گیا ۔
پاک بھارت حالیہ کشیدگی کے پیش نظر سیالکوٹ ایئرپورٹ کا آپریشن عارضی طور پر بند کیا گیالیکن جلد ہی بحال کر دیا گیا۔ یورپی پابندیوں کے خاتمے کے بعد پی آئی اے کی نجکاری کے عمل کو تیز کر دیا گیا ہے اور سرمایہ کاروں کے لئے کشش بڑھ گئی ہے۔ پی آئی اے کی نیویارک پروازوں کو بھی جلد بحال کرنے کی کوششیں جاری ہیں ۔ پی اے اے نے ہوائی اڈوں کو جدید ٹیکنالوجی سے لیس کرنے کے لیے ایئرپورٹ 5.0 ماڈل متعارف کرانے کا فیصلہ کیا ہے ۔
پی اے اے اور پی آئی اے کی حالیہ کامیابیاں پاکستانی ایوی ایشن انڈسٹری کے لیے ایک نئے دور کا آغاز ہیں۔ یورپ کی پروازوں کی بحالی، حج آپریشنز کی کامیابی، اور ہوائی اڈوں کی جدید کاری نے پاکستان کو بین الاقوامی سطح پر ایک قابل اعتماد ایوی ایشن ہب کے طور پر متعارف کرایا ہے۔ ان اقدامات اورخاص طور پر پی آئی اے کی نجکاری اور ٹیکنالوجی کے استعمال کے بعد مستقبل میں مزید بہتری کی توقع ہے۔\395
