پنجاب کے بیشتر اضلاع میں مون سون بارشوں کاپانچواں سلسلہ کل سے31 جولائی تک جاری رہے گا،ترجمان پی ڈی ایم اے

لاہور (اُردو پوائنٹ اخبارتازہ ترین - اے پی پی۔ 28 جولائی2025ء) وزیر اعلی پنجاب مریم نواز شریف کی ہدایات کے پیشِ نظر پی ڈی ایم اے کی مون سون فیکٹ شیٹ جاری کر دی گئی ۔ترجمان پی ڈی ایم اے کے مطابق گزشتہ 24 گھنٹوں میں سیالکوٹ میں بارش و بوندا باندی ریکارڈ کی گئی۔آئندہ 24 گھنٹوں میں پنجاب کے بیشتر اضلاع میں مون سون بارشوں کاپانچواں سلسلہ28 جولائی( پیر کی شام ) سے شروع ہو گا جو 31 جولائی تک جاری رہے گا۔

ترجمان کے مطابق بارشوں کے باعث پنجاب کے دریاوں اور ندی نالوں میں طغیانی کا خدشہ ہے ۔وزیر اعلی پنجاب کی ہدایات کے پیشِ نظر صوبے بھر کی انتظامیہ اور متعلقہ محکموں کو الرٹ جاری کر دیا گیا ہے ۔گزشتہ 24 گھنٹوں میں بارشوں کے باعث حادثات سے کوئی جانی نقصان نہیں ہوا ۔رواں سال مون سون بارشوں میں حادثات کے باعث 152 شہری جاں بحق اور 539 زخمی ہوئے جبکہ210 گھر متاثر اور 121 مویشی ہلاک ہوئے ۔

(جاری ہے)

یہ تمام اموات آسمانی بجلی ،مخدوش عمارتوں کے گرنے، دریاوں میں نہاتے ہوئے ڈوبنے اور کرنٹ لگنے سے ہوئیں ۔تر جمان نے بتایا کہ وزیر اعلی پنجاب کی ہدایات کے پیشِ نظر سوگوار خاندانوں کی مالی معاونت یقینی بنائی جا رہی ہے ۔اس کے علاوہ کسانوں کی فصلوں اور مویشیوں کے نقصانات کا بھی ازالہ کیا جائے گا ۔ترجمان پی ڈی ایم اے کے مطابق اس وقت منگلا ڈیم میں 56 فیصد جبکہ تربیلا میں 85 فیصد پانی موجود ہے۔

انڈین ڈیمز میں پانی کی سطح تقریبا 43 تک فیصد ہے۔دریائے سندھ میں کالا باغ، تربیلا اور چشمہ کے مقام پر نچلے درجے کا سیلاب ہے۔دریائے سندھ میں تونسہ کے مقام پر درمیانے درجے کی سیلابی صورتحال ہے۔ دریائے چناب راوی جہلم اور ستلج میں پانی کا بہاو فی الحال نارمل سطح پر ہے۔ترجمان کے مطابق ممکنہ سیلابی خطرے کے پیشِ نظر پی ڈی ایم اے کے انتظامات مکمل ہیں۔ پی ڈی ایم اے کنٹرول روم اور ڈسٹرکٹ ایمرجنسی آپریشن سنٹرز 24/7 صورتحال کو مانیٹر کر رہے ہیں۔ تر جما ن کے مطابق حکومت پنجاب کی جانب سے دریاوں نہروں اور برساتی نالوں میں نہانے پر مکمل پابندی عائد ہے ،قوانین کی خلاف ورزی کرنے والوں کے خلا ف سخت ایکشن لیا جائے گا ۔