دھیرکوٹ، یومِ استحصال، یومِ آزادی اور یومِ نیلہ بٹ کے حوالہ سے مسلم کانفرنس کی میٹنگ، سردارعتیق احمد خان کا خطاب

مظفرآباد /دھیرکوٹ (اُردو پوائنٹ اخبارتازہ ترین - این این آئی۔ 28 جولائی2025ء)صدر مسلم کانفرنس و سابق وزیراعظم آزادکشمیر سردار عتیق احمد خان نے دھیرکوٹ میں ایم سی آفس میں منعقدہ ایک اہم اجلاس میں شرکت کی، اجلاس م یں مسلم کانفرنس کے سینئر رہنما میجر (ر) سردار نصراللہ خان، راجہ تبارک علی خان ،عرفان عباسی ،راجہ منیر،نسرین اخترراجہ،نصرت شکیل ،ملک امان ،ایم ایس ایف ،یوتھ ونگ ،ٹریڈ ونگ نے شرکت کی،جو 5 اگست ''یومِ استحصال''، 14 اگست ''یومِ آزادی'' اور 23 اگست ''یومِ نیلہ بٹ'' کے حوالے سے بلایا گیا تھا۔

اجلاس میں ضلعی و مقامی قیادت، کارکنان اور منتخب نمائندوں نے بڑی تعداد میں شرکت کی۔اس موقع پر خطاب کرتے ہوئے سردار عتیق احمد خان نے کہا کہ 5 اگست 2019 کو بھارت نے کشمیر کی خصوصی حیثیت ختم کر کے کشمیریوں کے حقوق پر بدترین شب خون مارا، جسے تاریخ کبھی معاف نہیں کرے گی۔

(جاری ہے)

انہوں نے کہا کہ یومِ استحصال کے دن ہمیں دنیا کو مقبوضہ کشمیر میں جاری مظالم سے آگاہ کرنا ہے اور بھرپور آواز بلند کرنی ہے۔

انہوں نے 14 اگست کو ''یومِ آزادی پاکستان'' کے طور پر جوش و خروش سے منانے کی ضرورت پر زور دیتے ہوئے کہا کہ پاکستان کشمیریوں کی منزل ہے اور ہم تکمیلِ پاکستان کی جدوجہد میں مصروفِ عمل ہیں۔23 اگست کے متعلق گفتگو کرتے ہوئے صدر مسلم کانفرنس نے کہا کہ ''یومِ نیلہ بٹ'' ہماری جدوجہدِ آزادی کی علامت ہے اور یہ دن تحریکِ آزادی کے ان عظیم مجاہدوں کو خراجِ عقیدت پیش کرنے کا دن ہے جنہوں نے جانوں کا نذرانہ دے کر ریاست کے عوام کو شعور بخشا۔

اجلاس کے دوران آئندہ کی تقریبات کے شیڈول، پروگرامز اور عوامی شرکت کے حوالے سے مختلف تجاویز پیش کی گئیں اور تنظیمی سطح پر تیاریوں کو حتمی شکل دی گئی۔ اجلاس کے اختتام پر دعا کی گئی کہ مقبوضہ کشمیر کے مظلوم عوام جلد آزادی کی نعمت سے ہمکنار ہوں۔دریں اثناء صدر مسلم کانفرنس و سابق وزیراعظم آزاد کشمیر سردار عتیق احمد خان نے اپنے حالیہ دورہ جات کے دوران ارجہ، باغ اور دھیرکوٹ میں مختلف تقریبات میں شرکت کی اور عوامی و پارٹی رہنماؤں سے ملاقاتیں کیں۔

سردار عتیق احمد خان نے ارجہ میں انجمن تاجران کی جانب سے دی گئی ایک پرتکلف ضیافت میں شرکت کی۔ اس موقع پر انجمن تاجران کے صدر راجہ افتخار عرف گڈو، جنرل سیکرٹری ناصر ارباب چغتائی، سرپرست اعلیٰ راجہ امجد عارف، سابق صدر راجہ صغیر احمد خان، حافظ گلفراز عباسی، ڈاکٹر عابد عباسی سمیت دیگر عہدیداران نے مہمانِ خصوصی کا پرتپاک استقبال کیا۔

مسلم کانفرنس کے سینئر رہنما میجر (ر) سردار نصراللہ خان، راجہ تبارک علی خان اور دیگر کارکنان بھی ان کے ہمراہ تھے۔ تقریب میں علاقائی ترقی، تاجر برادری کے مسائل اور جماعتی صورتحال پر تبادلہ خیال کیا گیا۔باغ میں شادی کی تقریب میں شرکت سردار عتیق احمد خان نے بعد ازاں ضلع باغ کا دورہ کیا جہاں انہوں نے مسلم کانفرنس ضلع باغ کے صدر سردار مشتاق نیئر کے صاحبزادے کی شادی کی تقریب میں خصوصی شرکت کی۔

انہوں نے نو بیاہتا جوڑے کو نیک تمناؤں کے ساتھ دعا دی اور پارٹی رہنماؤں سے غیر رسمی ملاقاتوں کے دوران تنظیمی امور پر بھی بات چیت کی۔دھیرکوٹ میں اہم اجلاس سے خطاب صدر مسلم کانفرنس نے دھیرکوٹ میں ایم سی آفس میں منعقدہ ایک اہم اجلاس میں شرکت کی۔ اجلاس میں 5 اگست ''یومِ استحصال کشمیر''، 14 اگست ''یومِ آزادی پاکستان'' اور 23 اگست ''یومِ نیلہ بٹ'' کی مناسبت سے پارٹی کی حکمت عملی اور تقریبات کے انتظامات پر تفصیلی غور کیا گیا۔

سردار عتیق احمد خان نے اجلاس سے خطاب کرتے ہوئے کہا کہ ''یومِ استحصال'' کشمیریوں کے حقوق غصب کیے جانے کی یاد دلاتا ہے اور ہمیں اس دن کو بھرپور طریقے سے منانا ہوگا تاکہ دنیا کو بھارتی مظالم سے آگاہ کیا جا سکے۔انہوں نے کہا کہ 14 اگست ہماری آزادی کی علامت ہے جبکہ 23 اگست کا دن تحریکِ آزادی کشمیر میں نیلہ بٹ کے مقام پر ہونے والی جدوجہد کی یاد ہے، جسے ہرسطح پر اجاگر کیا جانا چاہیے۔اجلاس میں مقامی قیادت اور کارکنان نے بڑی تعداد میں شرکت کی اور قیادت کو اپنے بھرپور تعاون کا یقین دلایا۔