قومی تھرو بال اور کیچ بال ٹیموں کے چنائو کے لئے دو روز ٹرائلز ہفتہ سے شروع ہوں گے

جمعہ 1 اگست 2025 16:39

اسلام آباد (اُردو پوائنٹ اخبارتازہ ترین - اے پی پی۔ 01 اگست2025ء) قومی تھرو بال اور کیچ بال ٹیموں کے چنائو کے سلسلہ دو روز ٹرائلز (کل) ہفتہ سے منی سپورٹس کمپلیکس، ناظم آباد کراچی میں شروع ہوں گے۔ پاکستان تھرو بال فیڈریشن کے سیکرٹری جنرل مقبول آرائیں نے بتایا کہ ٹرائلز کے انتظامات مکمل کر لئے گئے ہیں اور خواتین کی ٹیموں کے چنائو کے سلسلہ میں ٹرائلز شام 5 بجے سے ساڑھے سات بجے تک جبکہ مردوں کے لئے ٹرائلز رات ساڑھے سات بجے سے ساڑھے آٹھ بجے تک منعقد ہوں گے۔

(جاری ہے)

قومی تھرو بال ٹیمیں انٹرنیشنل مینز اینڈ ویمنز تھرو بال چیمپئن شپ میں شرکت کریں گی جو 26 سے 30 دسمبر تک قطر میں منعقد ہو گی جبکہ قومی ویمن کیچ بال ٹیم ورلڈ ویمن کیچ بال چیمپئن شپ میں شرکت کرے گی جو 13 سے 16 نومبر ہالینڈ میں منعقد ہوگی۔ انہوں نے کہا کہ ٹرائلز میں کھلاڑیوں انتخاب میرٹ کی بنیاد پر ہوگا۔ ٹرائلز کے لئے مقبول آرائیں کی سربراہی میں الیکشن کمیٹی تشکیل دی گئی ہے دیگر ممبران میں عظمت پاشا، احمد ارشد، آئیون فیڈرک،عدنان ترین اوربلال حسین ہیں۔