پشاور،سٹی ٹریفک پولیس کے دستے نے شہید ٹریفک اہلکار شیر علی کی قبر پر حاضری و سلامی دی

جمعہ 1 اگست 2025 22:32

پشاور (اُردو پوائنٹ اخبارتازہ ترین - اے پی پی۔ 01 اگست2025ء) سٹی ٹریفک پولیس کے دستے نے شہید ٹریفک اہلکار شیر علی کی قبر پر حاضری و سلامی دی۔ڈی ایس پی ہیڈکوارٹرز فقیر حسین نے شہید کی قبر پر پھولوں کی چادر چڑھائی اور شہید کے درجات کی بلندی کے لئے فاتحہ خوانی کی۔اس موقع پر چیف ٹریفک آفیسر ہارون رشید خان کا کہنا تھا کہ ماضی کی طرح امسال بھی شہدائے پولیس کو خراج عقیدت پیش کرنے کیلئے 4اگست2025ء کو یوم شہدائے پولیس کے طور پر منایا جائے گا،شہداء کے ایصال ثواب کے لئے ختم القرآن،فاتحہ خوانی اور دعائیہ تقریبات کا اہتمام بھی کیا جائے گا۔

انہوں نے کہا کہ یوم شہداء پولیس کے منانے کا مقصد انہیں خراج عقیدت پیش کرنا اور ان کو یاد کرنا ہے کیونکہ یہ ہماری فورس کا اہم حصہ رہے ہیں، شہداء نے وطن عزیز کے دفاع کو مضبوط کرنے اور دہشتگردی کے خاتمے کیلئے قربانیاں دی ہیں۔

(جاری ہے)

انہوں نے کہا کہ شہدائے پولیس ہمارے اصل ہیروز ہیں جن کی قربانیوں کی بدولت آج مملکت خداداد میں امن قائم ہوا ہے،پورے پاکستان میں خیبر پختونخوا پولیس کی قربانیاں سب سے زیادہ ہیں جس کا ثبوت آئی جی رینک سے لے کر کانسٹیبل تک پولیس افسران کی شہادت ہے۔

انہوں نے کہا کہ خیبر پختونخوا پولیس نے دہشتگردی کے خلاف فرنٹ لائن پر جنگ لڑی اور سب سے زیادہ شہادتیں پیش کی ہیں،شہدائے پولیس کے لواحقین خود کو کسی طور پر بھی تنہا نہ سمجھیں ،پوری پولیس فورس ان کے ساتھ ہر خوشی اور غم کے موقع پر کھڑی ہے۔انہوں نے کہا کہ شہدائے پولیس کے ورثاء نے اپنے لخت جگر وطن عزیز کیلئے قربان کیے ہیں جن کی قربانی کسی طور پر بھی رائیگاں نہیں جانے دی جائیگی، شہدائے پولیس کو نہیں بھلایا جائیگا کیونکہ جو قومیں اپنے شہیدوں کو بھول جاتی ہیں وہ دنیا کی تاریخ سے مٹ جاتی ہیں۔