Live Updates

فواد خان کی گلوکاری کی دنیا میں شاندار واپسی

مداحوں نے نہ صرف فواد خان کی پرفارمنس کو سراہا بلکہ ویلو سانڈ اسٹیشن کو بھی خراج تحسین پیش کیا

اتوار 3 اگست 2025 11:15

کراچی (اُردو پوائنٹ اخبارتازہ ترین - این این آئی۔ 03 اگست2025ء)پاکستان کے معروف اداکار اور گلوکار فواد خان نے ایک طویل وقفے کے بعد گلوکاری کی دنیا میں شاندار انداز میں واپسی کی ہے، اور مداحوں کو خوشگوار حیرت میں مبتلا کردیا ہے۔فواد خان، جنہوں نے راک بینڈ ای پی (Entity Paradigm) کے ساتھ اپنی گلوکاری کا آغاز کیا تھا، اب ویلو سانڈ اسٹیشن کے پلیٹ فارم سے ایک نیا نغمہ پروانہ لے کر سامنے آئے ہیں۔

یہ نغمہ محبت، دھوکے اور پچھتاوے کے جذبات پر مبنی ہے، جس میں فواد خان نے ایک ایسے عاشق کا کردار ادا کیا ہے جو بارش میں بھیگی یادوں کے ساتھ اپنے ماضی کی غلطیوں پر پشیمان دکھائی دیتا ہے۔گانے کی ویڈیو دل کو چھو لینے والی ہے، اور بارش کے پس منظر میں عکس بند مناظر اسے اور بھی جذباتی بنا دیتے ہیں۔

(جاری ہے)

گانے کی پیشکش مشہور ہدایتکار بلال لاشاری نے کی ہے، اور فواد خان نے اپنے مخصوص انداز اور بے مثال اداکاری سے اس گانے میں جان ڈال دی ہے۔

مداحوں کی جانب سے اس گانے کو بھرپور سراہا جا رہا ہے، خاص طور پر ای پی کے پرانے چاہنے والے فواد کو دوبارہ مائیک تھامے دیکھ کر بے حد پرجوش ہیں۔ ایک مداح نے لکھا، پہلی بار ویلو کا لنک کلک کیا، صرف اس لیے کہ فواد خان کی اسکرین پر واپسی ہوئی ہے۔ ایک اور تبصرہ آیا، ای پی کا لیجنڈ واپس آ گیا ہی! جبکہ کسی نے فواد کی صلاحیتوں کو سراہتے ہوئے لکھا، فواد خان کو چمکنے کے لیے بالی وڈ کی ڈوبتی نا کی ضرورت نہیں، اس کا ٹیلنٹ ہی کافی ہے۔

مداحوں نے نہ صرف فواد خان کی پرفارمنس کو سراہا بلکہ ویلو سانڈ اسٹیشن کو بھی خراج تحسین پیش کیا کہ انہوں نے ایک بار پھر ایک لیجنڈری گلوکار کو سننے کا موقع دیا۔ فواد خان کی یہ واپسی ان کے فنی سفر کا نیا اور خوش آئند باب ثابت ہو رہی ہے، اور مداح ایک بار پھر ان کی آواز میں نئی موسیقی سننے کے لیے بے چین ہیں۔