اے این ایف کارروائیاں، ایک کروڑ 22 لاکھ روپے مالیت کی منشیات برآمد، 3 خواتین سمیت 10 ملزمان گرفتار

پیر 4 اگست 2025 15:51

اسلام آباد (اُردو پوائنٹ اخبارتازہ ترین - اے پی پی۔ 04 اگست2025ء) اینٹی نارکوٹکس فورس (اے این ایف) نےتعلیمی اداروں کے اطراف اور ملک کے مختلف شہروں میں منشیات سمگلنگ کے خلاف کریک ڈاؤن کرتے ہوئے کارروائیوں میں ایک کروڑ 22 لاکھ روپے سے زائد مالیت کی 102.22 کلوگرام منشیات برآمد کرکے 3 خواتین سمیت 10 ملزمان کو گرفتار کر لیا۔پیر کوترجمان اے این ایف کی جانب سے جاری بیان کے مطابق تعلیمی اداروں میں کارروائیوں میں اسلام آباد موٹروے ٹول پلازہ کے قریب جوسر مشین میں چھپائی گئی 1 کلو چرس برآمد کرکے ملزم کو گرفتار کر لیا،گرفتار ملزم نے تعلیمی اداروں کے طلباء کو منشیات فروخت کرنے کا اعتراف کر لیا۔

دیگر کارروائیوں میں جناح انٹرنیشنل ایئرپورٹ کراچی پر قطر جانے والے مسافر کے گِٹار میں چھپائی گئی 490 گرام افیون برآمد کرکے ملزم کو گرفتار کر لیا۔

(جاری ہے)

علامہ اقبال انٹرنیشنل ایئرپورٹ پر جدہ جانے والے مسافر کے پیٹ سے460 گرام وزنی 79 آئس بھرے کیپسول برآمد کرکے ملزم کو گرفتار کر لیا۔جی پی او اسلام آباد کے قریب واقع کوریئر آفس سے نیوزی لینڈ بھیجے جانے والے پارسل سے 20.450 کلو آئس برآمد کرکے 2 خواتین کو گرفتار کر لیا۔

کراچی کورنگی میں واقع کوریئر آفس سے نیوزی لینڈ بھیجے جانے والے پارسل سے 1.2 کلو آئس برآمد کرلی ۔زیرو پوائنٹ اوتھل کے قریب مسافر بس میں سوار خاتون کے بیگ سے 1 کلو آئس برآمد کرکے ملزمہ کو گرفتار کر لیا۔سریاب روڈ کوئٹہ پر رکشہ کے خفیہ خانے سے 70 کلو چرس برآمد کرکے 2 ملزمان کو گرفتار کرلیا۔مانسہرہ ٹول پلازہ کے قریب گاڑی سے 7.620 کلو چرس برآمد کرکے 2 ملزمان کو گرفتار کر لیا۔گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔