مودی سرکار کا 5 اگست 2019ء کا اقدام کشمیری عوام کے بنیادی حق خودارادیت پر کھلا وار تھا ، وفاقی وزیر ریلوے محمد حنیف عباسی کا یوم استحصال کشمیر پر پیغام

اسلام آباد (اُردو پوائنٹ اخبارتازہ ترین - اے پی پی۔ 04 اگست2025ء) وفاقی وزیر ریلوے محمد حنیف عباسی نے کہا ہے کہ 5 اگست 2019ء تاریخ کا وہ سیاہ دن ہے جب مودی سرکار نے آئین ہند کی دفعات 370 اور 35-A کو ختم کر کے مقبوضہ جموں و کشمیر کی متنازع حیثیت کو یکطرفہ طور پر ختم کرنے کا غیر آئینی اور غیر اخلاقی اقدام کیا۔وزارتِ ریلوے سے جاری بیان کے مطابق یوم استحصال کے موقع پر اپنے خصوصی پیغام میں محمد حنیف عباسی نے کہا کہ یہ اقدام کشمیری عوام کے بنیادی حق خودارادیت پر ایک کھلا وار تھا جو نہ صرف اقوام متحدہ کی قراردادوں بلکہ بین الاقوامی قانون کی بھی صریح خلاف ورزی ہے۔

انہوں نے کہا کہ نہ کشمیریوں نے اس اقدام کو تسلیم کیا، نہ پاکستان نے اور نہ ہی دنیا کی باشعور اقوام نے اسے قبول کیا۔

(جاری ہے)

انہوں نے کہا کہ کشمیری عوام نے اس غیر قانونی فیصلے کو دوٹوک انداز میں رد کر دیا اور آج بھی اپنے حق خودارادیت کے لیے پرعزم ہیں۔وفاقی وزیر نے کہا کہ پاکستان نے ہمیشہ کشمیریوں کے موقف کی کھل کر حمایت کی ہے اور عالمی سطح پر ان کا مقدمہ جرات اور استقامت کے ساتھ لڑا ہے۔

محمد حنیف عباسی نے کہا کہ الحمدللہ آج کشمیری، خواہ وہ مقبوضہ کشمیر میں ہوں یا آزاد کشمیر میں پاکستان سے اپنی وابستگی پر فخر کرتے ہیں اور اپنے جذبات کا اظہار کھلے دل سے کر رہے ہیں۔انہوں نے کہا کہ حالیہ پاک-بھارت کشیدگی اور پاکستان کی کامیابیوں پر کشمیری عوام نے جس محبت، اعتماد اور فخر کا اظہار کیا ہے وہ اس رشتے کی گہرائی کا واضح ثبوت ہے، کشمیری جانتے ہیں کہ ان کی قربانیاں رائیگاں نہیں جائیں گی، آنے والا وقت ان کے صبر، جدوجہد اور ایثار کا ثمر لائے گا۔

محمد حنیف عباسی نے مزید کہا کہ بھارتی حکومت کی سازشیں اور مظالم کشمیری عوام کے جذبہ حریت کو توڑنے میں مکمل طور پر ناکام ہو چکی ہیں، یاسین ملک جیسے بہادر حریت رہنما آج بھی بھارتی جیلوں میں قید ہیں لیکن کشمیری قوم کے حوصلے اور استقامت میں ذرّہ برابر بھی لغزش نہیں آئی۔ وفاقی وزیر ریلوے نے اس بات پر زور دیا کہ مودی حکومت کا وار ناکام ہو چکا ہے اور کشمیریوں کا حق خودارادیت اب پہلے سے کہیں زیادہ قریب ہے ، ان شاء اللہ کشمیریوں کی لازوال قربانیاں ضرور رنگ لائیں گی، آزادی کا سورج جلد طلوع ہوگا، ظلم و جبر کی طویل رات اب اپنے انجام کو پہنچنے کو ہے۔

محمد حنیف عباسی نے اپنے پیغام کا اختتام ان ایمان افروز کلمات ’’کشمیر بنے گا پاکستان ‘‘ کے ساتھ کرتے ہوئے کہا کہ یہ محض نعرہ نہیں بلکہ ہمارا ایمان ہے، آنے والی نسلیں خود یہ نعرہ پایہ تکمیل تک پہنچتے ہوئے سنیں گی۔ انہوں نے کہا کہ کشمیر کی آزادی اب دور نہیں، وہ دن جلد آئے گا جب کشمیر پاکستان کا ناقابل تقسیم حصہ بنے گا۔