صوبہ بھر میں سکیورٹی ہائی الرٹ، ملک دشمن عناصر پر کڑی نظر رکھی جائے گی،آئی جی پنجاب

منگل 5 اگست 2025 16:43

لاہور (اُردو پوائنٹ اخبارتازہ ترین - اے پی پی۔ 05 اگست2025ء) پنجاب پولیس یوم استحصال کشمیر پر مقبوضہ جموں و کشمیر کے عوام کی دلیرانہ جدوجہد کو سلام پیش کرتی ہے، آئی جی پنجاب ڈاکٹر عثمان انورنے اپنے بیان میں کہاکہ پنجاب پولیس گذشتہ کئی دہائیوں سے جاری بھارتی غاصبانہ قبضے، جموں و کشمیر کی خصوصی حیثیت ختم کرنے کی پرزور مذمت کرتی ہے، مقبوضہ کشمیر کے عوام گذشتہ کئی دہائیوں سے آزادی، حق خودارادیت اور بقاء کی جنگ لڑ رہے ہیں، یوم استحصال کشمیر پر صوبائی دارالحکومت سمیت صوبہ بھر میں سکیورٹی ہائی الرٹ، شرپسند و ملک دشمن عناصر پر کڑی نظر رکھی جائے گی، آئی جی پنجاب نے کہا ہے کہ کسی بھی شخص کو قانون ہاتھ میں لینے، امن و امان سبوتاژ کرنے کی ہرگز اجازت نہیں دی جائے، لاہور سمیت صوبہ بھر میں 10 ہزار سے زائد پولیس افسران و اہلکار سکیورٹی و ٹریفک انتظامات پر تعینات ہیں، لاہور سمیت صوبہ بھر میں یوم استحصال کشمیر پر منعقدہ ریلیوں، سیمنارز سمیت پروگراموں کو فول پروف سکیورٹی فراہم کی جا رہی ہے، حساس مقامات پر منعقدہ یوم استحصال کشمیر ریلیز اور اے کیٹگری پروگراموں پر اضافی نفری تعینات ہے، آئی جی پنجاب نے کہا کہ یوم استحصال کشمیر پر شہروں کے داخلی و خارجی راستوں پر چیکنگ بڑھائی جائے، آر پی اوز، سی پی اوز، ڈی پی اوز، ٹریفک افسران یوم استحصال کشمیر پروگراموں کے سکیورٹی و ٹریفک انتظامات کی خود نگرانی کریں۔