5 اگست 2019 وہ سیاہ ترین دن ہے جب بھارت نے مقبوضہ جموں وکشمیر میں لاک ڈائون کا نفاذ کر کے وادی کو جیل میں تبدیل کر دیا،حاجی نورمحمد خان دمڑ

منگل 5 اگست 2025 17:11

کوئٹہ (اُردو پوائنٹ اخبارتازہ ترین - اے پی پی۔ 05 اگست2025ء) مسلم لیگ ن کے مرکزی رہنما و وزیر خوراک و چیئرمین فوڈ اتھارٹی بلوچستان حاجی نورمحمد خان دمڑ نے کہا ہے کہ 5 اگست 2019 وہ سیاہ ترین دن ہے جب بھارتی حکومت نے مقبوضہ جموں وکشمیر میں لاک ڈائون کا نفاذ کر کے پوری وادی کو جیل میں تبدیل کر دیا، طویل ترین لاک ڈائون میں بھارتی افواج نے مقبوضہ جموں و کشمیر میں درندگی کی انتہا کرتے ہوئے معصوم نہتے کشمیریوں کو ظلم و بربریت کا نشانہ بنایا اور غیر قانونی تسلط مسلط کیااس تمام تر صورتحال کے پیش نظر بھارتی حکومت کے 5 اگست کے فیصلے سے خطے کے امن کا توازن تباہ ہو گیا ہے ۔

ان خیالات کا اظہار نے یوم استحصال کے موقع پر اپنے پیغام میں کیا۔انہوں نے کہا کہ پاکستان مسئلہ کشمیر کا پر امن اور اقوام متحدہ کی قراردادوں کے مطابق حل چاہتا ہے ،تمام تر مسائل کا حل ڈائیلاگ ہے اور جنگ کسی بھی مسئلے کا حل نہیں ۔

(جاری ہے)

ان کا کہنا تھا کہ تاریخ اس بات کی گواہ ہے کہ بین الریاستی مسائل ہمیشہ مذاکرات کی میز پر ہی حل ہوئے اور پائیدار امن اسی طریقے سے ہی قائم کیا جا سکتا ہے ،اقوام عالم اور خاص طور پر اس خطے کے امن و بقا کےلئے مسئلہ کشمیر کا حل کشمیریوں کی امنگوں کے مطابق ہونا نا گزیر ہے ۔

انہوں نے کہا کہ مقبوضہ وادی میں نافذ کیے گئے لاک ڈائون کوچھ سال پورے ہو گئے ہیں اور ان چھ برسوں کی تاریخ بے گناہ اور نہتے کشمیریوں کے خون سے بھری پڑی ہے ۔ حاجی نورمحمد خان دمڑ نے عالمی برادری سے مطالبہ کیا کہ وہ مقبوضہ کشمیر میں ہونے والی بدترین انسانی حقوق کی پامالیوں اور ظلم و بربریت کے تدارک کےلئے بھارت پر دبا ئوڈالے اور مقبوضہ کشمیر کے عوام کی خواہشات اور اقوام متحدہ کی قرار دادوں کے مطابق اس مسئلے کو حل کرائے۔