ضلع کوہستان اپر میں محکمہ صحت کے فنڈز میں غبن اور بے قاعدگی پر اینٹی کرپشن خیبرپختونخوا کی کارروائی، ایف آئی آر درج

منگل 5 اگست 2025 20:35

پشاور(اُردو پوائنٹ اخبارتازہ ترین - این این آئی۔ 05 اگست2025ء)اینٹی کرپشن خیبرپختونخوا نے ضلع کوہستان اپر میں سرکاری فنڈز میں بے قاعدگیوں اور غبن پر کارروائی کرتے ہوئے محکمہ صحت کے سینئر افسران کے خلاف ایف آئی آر درج کردی۔ اینٹی کرپشن خیبرپختونخوا کو محکمہ صحت کوہستان اپر میں فنڈز کے غلط استعمال اور مالی بے ضابطگیوں سے متعلق موصول شکایت پر انکوائری اور آڈٹ کیا گیا۔

(جاری ہے)

انکوائری میں الزامات درست ثابت ہوئے۔ انکوائری رپورٹ کے مطابق سرکاری خزانے کو بھاری نقصان پہنچایا گیا۔ اینٹی کرپشن خیبرپختونخوا نے مبینہ طور پرسابق ڈسٹرکٹ ہیلتھ آفیسر اپر کوہستان ڈاکٹر خورشید اور اکاؤنٹنٹ آفیسر اختر محمد کے خلاف ایف آئی آر درج کردی ہے۔ ایف آئی آر میں تعزیرات پاکستان کی دفعات 409، 420، 419، 468، 471، 477-A، 34 اور انسداد بدعنوانی ایکٹ 5(2) شامل کی گئی ہیں۔ اینٹی کرپشن ٹیم نے کارروائی کرتے ہوئے ملزم اختر محمد کو گرفتار کر لیا ہے۔