برصغیر میں مستقل امن کیلئے مسئلہ کشمیر کا حل ناگزیر ،بھارتی مظالم کے باوجود کشمیریوں کا حوصلہ اور ہمت قابل تحسین ہے،وزیراعلی پنجاب

منگل 5 اگست 2025 21:00

لاہور (اُردو پوائنٹ اخبارتازہ ترین - اے پی پی۔ 05 اگست2025ء) وزیراعلی پنجاب مریم نواز نے کہا ہے کہ بھارت کے غیرقانونی زیرقبضہ مقبوضہ جموں وکشمیر کے غیور بہن بھائیوں کی قربانیوں کو سلام پیش کرتی ہوں، مقبوضہ جموں و کشمیر کی آزادی لوح تقدیر پر ثبت ہو چکی ہے، کشمیر فیصلہ کرے گا ہم ساتھ کھڑے تھے،ہیں اور رہیں گے۔وزیراعلی پنجاب نے یومِ استحصالِ کشمیر پر اپنے خصوصی پیغام میں کہا کہ پانچ اگست 2019سے بھارتی مظالم میں بے تحاشااضافے کے باوجود کشمیریوں کا حوصلہ اور ہمت قابل تحسین ہے۔

بھارتی مقبوضہ جموں و کشمیر کا مسئلہ عالمی ضمیر پر سوال ہے۔ وزیراعلی نے کہا کہ حق خودارادیت کی جدوجہد میں کشمیری بہن بھائیوں کی قربانیوں کو خراج عقیدت پیش کرتی ہوں۔ مقبوضہ جموں و کشمیر میں بھارتی مظالم پر عالمی برادری کی بے حسی اور مجرمانہ خاموشی تاریخ کا سیاہ باب ہے۔

(جاری ہے)

کشمیرپر چھائی سیاہ رات ضرور ختم ہوگی اور آزادی کا سورج جلد طلوع ہوگا۔

انہوں نے کہا کہ برصغیر میں مستقل امن کیلئے مسئلہ کشمیر کا حل ناگزیر ہے۔ ہزاروں کشمیری شہدا کی قربانیاں رائیگاں نہیں جائیں گی۔انہوں نے کہا کہ بھارت ظلم کرکے کشمیریوں کے حق خودارادیت کو دبانے کی ناکام کوشش کررہا ہے۔ کشمیر ہر پاکستانی کے دل میں دھڑک رہا ہے۔ بھارت کے ظلم و ستم کی وجہ سے کشمیری ایک دہائی سے لاک ڈائون کی زندگی گزار رہے ہیں۔

کشمیریوں پر انسانیت سوز مظالم پر مستقل بے حسی عالمی ضمیر کے خلاف چارج شیٹ ہے۔انہوں نے کہا کہ بھارت کا ظلم وقتی ہے لیکن کشمیر کی آزادی مقدر ہے۔ مقبوضہ کشمیر میں انسانی حقوق کی پامالی ناقابل قبول ہے۔ دنیا کوکشمیر میں ہونے والی انسانی حقوق کی خلاف ورزی پر توجہ دینے کی سخت ضرورت ہے۔ بھارت کا قبضہ غیر قانونی، غیر اخلاقی اور غیر انسانی ہے۔ کشمیر کی سیاہ رات کا سورج ضرور طلوع ہوگا۔ انہوں نے کہا کہ دنیا پر کھل چکاہے کہ مسئلہ کشمیر بھارت کا داخلی معاملہ نہیں بلکہ انسانی المیہ بن چکا ہے۔ خطے کے ڈیڑھ ارب سے زیادہ لوگ امن اور خوشحالی کی سحر دیکھنے کے مستحق ہیں۔