حکومت کی آمدن 9946 ارب روپے، اخراجات 17 ہزار ارب روپے سے متجاوز

بدھ 6 اگست 2025 12:10

اسلام آباد(اُردو پوائنٹ اخبارتازہ ترین - این این آئی۔ 06 اگست2025ء)وزارت خزانہ نے گزشتہ مالی سال 2024 تا 2025 کی کے دوران وفاقی حکومت کے آمدن و اخراجات کی تفصیلات جاری کردیں۔دستاویز کے مطابق گزشتہ مالی سال کے دوران وفاقی حکومت کی خالص آمدن 9 ہزار 946 ارب روپے ریکارڈ کی گئی جبکہ حکومتی اخراجات 17 ہزار 36 ارب روپے تک پہنچ گئے۔زیرجائزہ عرصے کے دوران مالی خسارہ کم ہو کر جی ڈی پی کا 5.4 فیصد تک محدود رہا، مالی خسارے کا حجم 7 ہزار 90 ارب روپے ریکارڈ کیا گیا۔

رپورٹ کے مطابق قابل تقسیم محاصل سے صوبوں کو 6 ہزار 854 ارب روپے منتقل کئے، قرضوں پر سود کی ادائیگی میں 8 ہزار 847 ارب روہے خرچ ہوئے۔ حکومت آئی ایم ایف کے زیادہ تر اہداف حاصل کرنے میں کامیاب رہی۔دستاویز کے مطابق ایف بی آر 12970 روپے کا اصل سالانہ ہدف حاصل کرنے میں کامیاب نہ ہوا، گزشتہ مالی سال 11 ہزار 744 ارب ٹیکس جمع، ہدف سے 1226 ارب کم رہا، تاجر دوست اسکیم سے بھی 50 ارب روپے وصولی کا ہدف پورا نہ ہو سکا۔

(جاری ہے)

وزارت خزانہ کے مطابق چاروں صوبے 1200 ارب روپے ہدف کے بجائے 921 ارب کی بچت کرسکے، پنجاب نے سب سے زیادہ 348 ارب روپے کا سرپلس بجٹ دیا، سندھ 283 ارب، خیبرپختوانخوا 176 ارب، بلوچستان نے 114 ارب کی بچت کی۔وفاقی حکومت نے 2.4 کھرب روپے کا پرائمری بجٹ سرپلس ہدف حاصل کرلیا، جولائی تا جون پرائمری سرپلس 2719 ارب روپے سے زائد رہا۔دستاویز کے مطابق دفاع پر 2193 ارب، وفاقی ترقیاتی منصوبوں پر 1049 ارب خرچ ہوئے، ترقیاتی منصوبوں پر گزشتہ سال سے 43 فیصد زیادہ فنڈز خرچ کئے گئے، سبسڈیز کی ادائیگی پر 1297 ارب روپے خرچ کئے گئے۔ پنشن بل 910 ارب، سول امور چلانے پر 891 ارب روپے کے اخراجات آئے۔