وفاقی حکومت نے جبری گمشدگیوں پر انکوائری کمیشن کی تشکیلِ نو کر دی ، جسٹس (ریٹائرڈ)سید ارشد حسین شاہ کمیشن کے چیئرمین تعینات

جمعہ 8 اگست 2025 17:02

اسلام آباد (اُردو پوائنٹ اخبارتازہ ترین - این این آئی۔ 08 اگست2025ء)وفاقی حکومت نے جبری گمشدگیوں پر انکوائری کمیشن کی تشکیلِ نو کر دی جس کے مطابق جسٹس (ریٹائرڈ)سید ارشد حسین شاہ کمیشن کے چیئرمین تعینات کر دیئے گئے ،چیئرمن کمیشن برائے جبری گمشدگیاں جسٹس (ر)ارشد حسین شاہ کے عہدہ سنبھالنے کے بعد گمشدہ افراد کے مسئلے کے حل کیلئے اقدامات،کمیشن کو مبینہ جبری گمشدگیوں کے متعلق 10,607 کیسز موصول ہوگئے ،31 جولائی 2025 تک کمیشن نی8770 کیسز (82 فیصد)کیسز نمٹا دیے،جسٹس ریٹائرڈ سید ارشد حسین شاہ کے عہدہ سنبھالنے کے بعد جولائی کے مہینے میں کمیشن نے 70 کیسز نمٹائے، 15 نئی شکایات رجسٹرڈ کیں۔

چیئرمین کی جانب سے وفاقی حکومت کو مالی معاونت کے کیسز کی سفارشات پیش کرنے کیلئے قائم کردہ کمیٹی کے دو اجلاسوں کی صدارت کی گئی ،جسٹس (ر)نذر اکبر ممبر سندھ، ریٹائرڈ جج محمد بشیر ممبر اسلام آباد تعینات کردیئے گئے ،خیبر پختون خوا میں مبینہ جبری گمشدگیوں کے معاملات سے نمٹنے کیلئے جسٹس (ر)سید افسر شاہ ممبر خیبر پختون خواہ تعینات کئے گئے ۔

(جاری ہے)

کمیشن نے گمشدگیوں کے معاملات کی تفتیش اور معاملات جلد نمٹانے کیلئے یکساں پالیسی کی تشکیل کی ضرورت پر زور دیا ۔کمیشن کے چیئرمین نے گمشدگیوں کے تدارک کیلئے ضوابط کی تشکیل کیلئے لاہور اور کراچی کا بھی دورہ کیا ،کمیشن کے چیئرمین نے لاہور اور کراچی میں 50 سے زائد کیسز کی سماعت کی۔چیئرمین جسٹس (ر)سید ارشد حسین شاہ نے پنجاب، خیبر پختون خوا ، اسلام آباد اور سندھ کے داخلہ سیکرٹریز اور پولیس کے آئی جیز سے بھی ملاقاتیں کیں۔جبری گمشدگیوں پر کمیشن کے چیئرمین کا تمام صوبوں، اسلام آباد اور آزاد جموں وکشمیر کی مشترکہ تفتیشی ٹیمز اور صوبائی ٹاسک فورسز پر جامع رپورٹس بروقت جمع کرانے پر زور دیا گیا