کولگام آپریشن 10ویں روز میں داخل، 2زخمی بھارتی فوجی ہسپتال میں چل بسے، علاقہ مکین شدید مشکلات کا شکار

ہفتہ 9 اگست 2025 13:26

سرینگر (اُردو پوائنٹ اخبارتازہ ترین - اے پی پی۔ 09 اگست2025ء) بھارت کے غیر قانونی زیرتسلط جموں و کشمیر کے ضلع کولگام جاری آپریشن کے دوران زخمی ہونے والے چھ بھارتی فوجیوں میں سے 2ہسپتال میں زخموں کی تاب نہ لاتے ہوئے ہلاک ہو گئے ہیں۔کشمیر میڈیاسروس کے مطابق زخمی اہلکار سرینگر کے ایک فوجی ہسپتال میں داخل تھے جہاں وہ چل بسے۔ کولگام کے علاقے اکھل میں جاری آپریشن آج 10ویں روز میں داخل ہو گیا ہے۔

(جاری ہے)

آپریشن میں بھارتی فوجیوں ، پیرا ملٹری اور پولیس کے علاوہ پیرا کمانڈوز حصہ لے رہے ہیں۔ آپریشن میں گن شپ ہیلی کاپٹروں اور ڈرون کیمروں کا بھی استعمال کیا جا رہاہے۔فورسز نے آپریشن کے دوران اب تک دو نوجوان شہید کیے ہیں جبکہ اس دوران چھ فوجی بھی زخمی ہوئے ہیں جن میں سے دو چل بسے ہیں۔ علاقے میں بھارتی فورسز اور نامعلوم مسلح افراد کے خلاف شدید فائرنگ کا سلسلہ بدستور جاری ہے۔مسلسل آپریشن کی وجہ سے لوگ گونا گوں مشکلات کا شکار ہیں اور علاقے میں خوراک ، ادویات اور دیگر بنیادی اشیائے ضروریہ کی قلت پیدا ہو گئی ہے ۔