مارشل آرٹس جسمانی فٹنس ، نظم و ضبط اور خود اعتمادی جیسی صفات پیدا کرتا ہے،گورنر سندھ

اتوار 10 اگست 2025 19:10

کراچی (اُردو پوائنٹ اخبارتازہ ترین - اے پی پی۔ 10 اگست2025ء) گورنر سندھ کامران خان ٹیسوری نے کہاہے کہ مارشل آرٹ مقابلے صرف کھیل نہیں بلکہ پاکستان کا نام دنیا میں روشن کرنے کا ذریعہ ہیں، مارشل آرٹس جسمانی فٹنس ، نظم و ضبط اور خود اعتمادی جیسی صفات پیدا کرتا ہے۔اتوار کو گورنر ہائوس سے جاری اعلامیہ کے مطابق ان خیالات کا اظہار انہوں نے کے ایم سی اسپورٹس کمپلیکس میں جابر مارشل آرٹس اکیڈمی کی جانب سے منعقدہ میڈلز و شیلڈز تقسیم تقریب سے خطاب کے دوران کیا۔

انہوں نے کہا کہ جو بچہ بیرونِ ملک مقابلے میں حصہ لینا چاہے اور اخراجات برداشت نہ کر سکے، اس کا مکمل خرچہ میں خود اٹھاں گا۔اس سے قبل مارشل آرٹس تقریب کا پر جوش آغاز گورنر سندھ نے اینٹ توڑ کر کیا جس نے شرکاء میں جوش و خروش کی نئی لہر دوڑا دی۔

(جاری ہے)

اس موقع پر مارشل آرٹس کی شاندار ڈیمونسٹریشن بھی پیش کی گئی جسے حاضرین نے بھرپور داد دی۔گورنر سندھ نے کہا کہ یہاں مقابلہ میں شریک نوجوانوں کا جذبہ قابلِ دید ہے، میرا تعاون ہمیشہ آپ کے ساتھ رہے گا، میں آپ کے شانہ بشانہ کھڑا ہوں۔

انہو ں نے کہا کہ جابر مارشل آرٹس اکیڈمی کی خدمات قابلِ تحسین ہیں ۔ انہوں نے مزید کہا کہ ان بچوں کا جذبہ، ان کی مہارت اور اعتماد واقعی قابلِ دید ہے۔ تقریب میں ایم کیو ایم پاکستان کے سینئر رہنما ڈاکٹر فاروق ستار، انیس قائم خانی اور دیگر شخصیات بھی موجود تھیں۔