وفاقی وزیر کا 10 ستمبر کو کراچی میں جدید ریلوے سٹیشن کے افتتاح کا اعلان

روہڑی ریلوے اسٹیشن کو لاہور ماڈل پر اَپ گریڈ کیا جائے گا، سبی تا روہڑی 250 کلومیٹر سیکشن اور روہڑی تا کراچی 480 کلومیٹر ٹریک کی فزیبلٹی رپورٹ آئندہ دو ماہ میں مکمل ہوگی؛ حنیف عباسی کی میڈیا سے گفتگو

ساجد علی پیر 11 اگست 2025 11:42

وفاقی وزیر کا 10 ستمبر کو کراچی میں جدید ریلوے سٹیشن کے افتتاح کا اعلان

فیصل آباد ( اُردو پوائنٹ اخبارتازہ ترین۔ 11 اگست 2025ء ) وفاقی وزیر ریلوے حنیف عباسی نے 10 ستمبر کو کراچی میں جدید ریلوے سٹیشن کے افتتاح کا اعلان کردیا۔ فیصل آباد ریلوے سٹیشن کے دورے کے موقع پر میڈیا سے گفتگو کرتے ہوئے انہوں نے کہا کہ وزیر اعظم کے ویژن کے تحت پاکستان ریلوے آپریشنز کو جدید بنانے کے لیے ملک بھر میں مختصر اور طویل المدتی منصوبوں پر کام تیزی سے جاری ہے اور کراچی میں جدید طرز کا سٹیشن 10 ستمبر کو افتتاح کے لیے تیار ہو جائے گا، سندھ حکومت کے ساتھ معاہدے کے تحت روہڑی ریلوے اسٹیشن کو لاہور ماڈل پر اَپ گریڈ کیا جائے گا، سبی تا روہڑی 250 کلومیٹر سیکشن اور روہڑی تا کراچی 480 کلومیٹر ٹریک کی فزیبلٹی رپورٹ آئندہ دو ماہ میں مکمل ہو گی جس کے بعد اگلے سال جون تک تعمیر کا آغاز متوقع ہے۔

(جاری ہے)

وفاقی وزیر ریلوے کا کہنا ہے کہ ریلوے کی ڈیجیٹلائزیشن کے تحت ٹکٹنگ سسٹم مکمل طور پر آن لائن کر دیا گیا ہے، ٹرین ٹریکنگ سسٹم فعال ہے، بڑے اسٹیشنز پر اے ٹی ایم مشینیں نصب کردی گئی ہیں اور وزیراعلیٰ پنجاب کے تعاون سے صوبے کے 40 ریلوے اسٹیشنز پر وائی فائی سروس فراہم کرنے کا عمل جاری ہے، لاہور میں اس سروس کا آغاز ہو چکا ہے اور جلد ہی کراچی، حیدرآباد، فیصل آباد اور دیگر شہروں کے ریلوے سٹیشنز پر بھی یہ سہولت فراہم کردی جائے گی۔

انہوں نے کہا کہ ریلوے کی آؤٹ سورسنگ کا عمل 30 ستمبر تک مکمل کر لیا جائے گا جس کے تحت 9 سے 11 مسافر ٹرینیں، فریٹ ٹرینز، مہمان خانے، خصوصی سلونز، ہسپتال، سکولز اور دیگر سہولیات نجی شعبے کے حوالے کی جا رہی ہیں تاکہ سروسز کے معیار میں بہتری اور ادارے کی آمدنی میں خاطر خواہ اضافہ ہو، شاہدرہ تا رائیونڈ تک لینیئر پارک کی تعمیر کا کام شروع ہوچکا ہے جسے 2 ارب 35 کروڑ روپے کی لاگت سے مکمل کیا جائے گا، اسی طرح کراچی، لاہور، راولپنڈی اور ٹیکسلا سٹیشنز کی اپ لفٹ اور بلوچستان میں شیخ زید سے کچلاک تک 50 کلو میٹر سیکشن کی اَپ گریڈیشن بھی پلان کا حصہ ہے۔