9 مئی کے مزید دو مقدمات میں شاہ محمود قریشی بری، یاسمین راشد، اعجازچوہدری، محمود الرشید ،عمرسرفرازچیمہ کو 10، 10سال قید

لاہور(اُردو پوائنٹ اخبارتازہ ترین - این این آئی۔ 11 اگست2025ء)انسداد دہشتگردی کی خصوصی عدالت نے 9مئی کے مزید دو مقدمات میں پاکستان تحریک انصاف کے وائس چیئرمین شاہ محمود قریشی کو بری کردیا جبکہ ڈاکٹر یاسمین راشد، میاں محمود الرشید، اعجاز چوہدری اور عمرسرفراز چیمہ اور دیگر کو 10، 10سال قید جبکہ پی ٹی آئی پنجاب کی چیف آرگنائزر عالیہ حمزہ اورصنم جاویدکو ایک مقدمے میں 5،5سال قید اور ایک ، ایک لاکھ روپے جرمانے کی سزا سنا دی گئی ۔

عدالت نے ہفتے کے روز مقدمات کا ٹرائل مکمل ہونے کے بعد محفوظ کیا گیا فیصلہ سنایا ۔تفصیلات کے مطابق لاہور کی انسدادِ دہشتگردی کی خصوصی عدالت کے جج منظر علی گل نے 9 مئی کے جلا ئوگھیرا ئوکے تھانہ شادمان نذر آتش اور راحت بیکری کے باہر پولیس کی گاڑیاں جلانے کے دو مقدمات کا فیصلہ سنا دیا ۔

(جاری ہے)

عدالت نے فیصلہ سناتے ہوئے تحریک انصاف کے رہنمائوں ڈاکٹر یاسمین راشد ،میاں محمود الرشید ،اعجاز چوہدری ،عمر سرفراز چیمہ ،کو دس ،دس سال قید کی سزا جبکہ صنم جاوید اور عالیہ حمزہ کو ایک مقدمے میں پانچ ،پانچ سال قید کی سزا اور ایک ایک لاکھ روپے جرمانے کا حکم سنایا۔

عدالت نے بانی پی ٹی آئی کے گارڈ حافظ ارشد کوبھی دس سال قید کی سزا سنائی ۔تحریک انصاف کے وائس چیئرمین شاہ محمود قریشی کو دونوں مقدمات میں بری کردیا گیا ۔عدالت نے مقدمے میں نامزد پانچ کمسن ملزمان کو بری کر دیا ۔علاوہ ازیں فیصلے میںمحمد فہیم ،نیاز احمد ،علی حسن ،زین علی ،منفر احمد ،اسد علی ،بلال وجاہت کو بھی دس ،دس سال قید کی سزا سنائی گئی ۔

عدالت ہے تھانہ شادمان نذر آتش کیس میں 25 ملزمان میں سے 12 کو بری کر دیا جبکہ 13 ملزمان کو سزائیں سنائی گئیں۔بری ہونے والے ملزمان میں تحریک انصاف کے وائس چیئرمین شاہ محمود قریشی سہیل خان،اویس،رفیع الدین،فریدخان ،سلمان احمد،عبدالقادر،فیضان،طیب سلطان،شاہد بیگ، ماجد علی اوربخت روان شامل ہیںتھانہ شادمان نذر آتش کیس میں مجموعی طور پر41 ملزمان نامزد تھیجبکہ 15 ملزم اشتہاری قرار دیئے جا چکے ہیں، تھانہ شادمان نذر آتش کیس میں 6 ملزمان زیر حراست جبکہ ایک ملزم وفات پا چکا ہے۔

راحت بیکری کے باہر پولیس کی گاڑیاں جلانے کے مقدمے میں مجموعی طور پر25 ملزم نامزد ہیں جبکہ 7 ملزم اشتہاری قرار دیئے جا چکے ہیں، راحت بیکری کے باہر گاڑیاں جلانے کے مقدمے میں 12 ملزموں کا ٹرائل مکمل کیا گیا، مقدمے میں 5 ملزم زیر حراست ہیں۔لاہور میں اب تک نو مئی کے تین مقدمات کا فیصلہ سنایا جاچکا ہے ، انسداد دہشت گردی کی دو خصوصی عدالتوں کی طرف تین مقدمات میں 31 ملزمان کو سزائیں سنائی گئیں ،نو مئی کے تین مقدمات میں اب تک 26 ملزمان کو بری کیا جاچکا ہے ،شاہ محمود قریشی نو مئی کے تین مقدمات میں بری ہوچکے ہیں شاہ محمود قریشی کے خلاف نو مئی کے لاہور میں تاحال گیارہ مقدمات زیر سماعت ہے۔

دوران سماعت زیر حراست اوربرضمانت ملزمان جیل کے کمرہ عدالت میں موجود رہے۔فیصلہ سنائے جانے کے موقع پر جیل کے اندر اور باہر سکیورٹی کے غیر معمولی انتظامات کئے گئے تھے ۔ ہفتے کے روز جج منظر علی گل نے کوٹ لکھپت جیل میں سماعت کے دوران وکلا ء کے حتمی دلائل مکمل ہونے کے بعد فیصلہ محفوظ کیا تھا۔