یوم پاکستان محبت پھیلانے اور ایک ہوجانے کا دن ہے،حافظ امجد

منگل 12 اگست 2025 15:36

فیصل آباد (اُردو پوائنٹ اخبارتازہ ترین - اے پی پی۔ 12 اگست2025ء) پاکستان مسلم لیگ (ن) علما و مشائخ ونگ کے صوبائی جنرل سیکرٹری حافظ محمد امجد نے کہا کہ یوم پاکستان محبت پھیلانے اور ایک ہوجانے کا دن ہے، ہمیں اس موقع پر ہمیں اپنے ان ہم وطن بھائیوں کو یاد رکھنا چاہیے جنہیں ہماری مدد اور تعاون کی ضرورت ہے ۔اے پی پی سے بات چیت کے دوران انہوں نے کہا کہ یوم ۱ٓزادی کے متبرک، مقدس و پر مسرت موقع پرشہدائے تحریک پاکستان کو خراج عقیدت اور غازیوں کو خراج تحسین پیش کرنے کے علاوہ وطن عزیز کی سا لمیت کیلئے قیمتی جانوں کا نذرا نہ پیش کرنے والوں سے اظہار یکجہتی بھی کیا جائے گا۔

انہوں نے کہا کہ یہ دن ہمیں اپنے آباؤ اجداد کی برصغیر کے مسلمانوں کے لئے ایک محفوظ اور الگ وطن کے حصول کی جمہوری جدوجہد کی یاد دلاتا ہے جہاں آج ہم مذہبی، ثقافتی اور سماجی اقدار کے مطابق ہر طرح کی ۱ٓزاد فضا میں اپنی زندگیاں بسرکر رہے ہیں۔

(جاری ہے)

انہوں نے کہا کہ 14اگست کا دن ہمیں اخلاقیات،اخوت و یگانگت، امن کے ساتھ ساتھ وطن سے محبت کے اظہار کا درس دیتا ہے نیزیوم ۱ٓزادی پر ہمیں تجدید عہد کرنا ہوگا کہ ہم بین الاقوامی حالات کے تناظر میں ۱ٓپس کے تمام سیاسی، فروعی، لسانی،علاقائی اختلافات ختم کرکے پاکستان کو قائداعظم کے خوابوں کی تعبیر بناکر حقیقی معنوں میں فلاحی، عوامی و خوشحال ریاست بنائیں گے۔

انہوں نے کہا کہ اسلامی جمہوریہ کے نام کا مقصد ہی یہ ہے کہ اس وطن کو مکمل اسلامی ضابطہ حیات کے تحت جمہوریت کی پٹڑی پر رواں دواں رکھااور ملک کو حقیقی معنوں میں فلاحی عوامی ریاست بنایا جائے گا۔انہوں نے کہا کہ بانی پاکستان قائداعظم محمد علی جناح کی ولولہ انگیز قیادت میں ہمارے بزرگوں نے ہمیں آزاد ملک حاصل کرکے دیااسلئے اب ہماری ذمہ داری ہے کہ وطن عزیز کو خوشحال و ترقی یافتہ بنانے کیلئے کسی قربانی سے دریغ نہ کریں تاہم یوم آزادی وجشن معرکہ حق مناتے وقت ہمیں بھرپور محنت سے انسانیت اورملک کی خدمت کے عزم کا اعادہ بھی کرنا ہوگا۔

انہوں نے کہاکہ جب تک ملک کو کرپشن فری نہیں بنایا جائے گا اس وقت تک ہمارے مسائل حل نہیں ہوسکتے اسلئے ہم سب کو ملکر بابائے قوم کے خوابوں کو عملی تعبیر دینے کیلئے ملک کو کرپشن فری بنانے میں بھی اپنا کردار ادا کرنا ہوگا۔