سینیٹر اعظم سواتی کو بیرونِ ملک سفر کی اجازت مل گئی

پی ٹی آئی رہنما کا نام کسی لسٹ میں نہیں ہے، یہ سفر کرسکتے ہیں، ایف آئی اے کی یقین دہانی کے بعد عدالت نے درخواست نمٹا دی

فیضان ہاشمی منگل 12 اگست 2025 12:32

پشاور ( اُردو پوائنٹ اخبارتازہ ترین۔ 12 اگست 2025ء )پاکستان تحریک انصاف کے سینیٹر اعظم سواتی کو بیرونِ ملک سفر کی اجازت مل گئی۔ پشاور ہائیکورٹ میں ای سی ایل اور پی سی ایل سے اعظم سواتی کا نام نکالنے کی درخواست پر جسٹس سید ارشد علی اور جسٹس ڈاکٹر خورشید اقبال نے سماعت کی۔ وکیل درخواست گزار علی عظیم افریدی ایڈوکیٹ نے کہا کہ 13 اگست کو صبح 9 بجے درخواست گزار کی فلائٹ ہے، درخواست گزار کا نام لسٹ میں ہے، اس وجہ سے سفر نہیں کرسکتے، عدالت نے نام نکالنے کا حکم دیا لیکن ان کو ائیرپورٹ پر جانے نہیں دیا گیا۔

(جاری ہے)

اسسٹنٹ اٹارنی جنرل نے کہا کہ درخواست گزار کا نام اب کسی لسٹ میں نہیں ہے، ان کا نام نکال دیا ہے، جسٹس سید ارشد علی نے استفسار کیا کہ اب یہ بیرونی ملک سفر کرسکتے ہیں؟ نمائندہ ایف آئی اے نے جواب دیا کہ ان کا نام کسی لسٹ میں نہیں ہے، یہ سفر کرسکتے ہیں۔ اعظم سواتی کا نام لسٹ سے نکالنے پر عدالت نے درخواست کو نمٹا دیا۔ واضح رہے پی ٹی آئی رہنما ا سینیٹر اعظم سواتی کو پشاور ایئرپورٹ پر بیرون ملک جانے سے روک لیا گیا تھا۔ اعظم سواتی نے پشاور ہائی کورٹ میں خود کو بیرون ملک جانے سے روکنے پر توہین عدالت کی درخواست دائرکی تھی۔