چیئرمین سینیٹ کی مشیر مصباح کھر کی بیلجیم کے سفیر سے ملاقات،پارلیمانی روابط کے فروغ، آئندہ عالمی پارلیمانی فورمز میں شمولیت پر تبادلہ خیال

منگل 12 اگست 2025 16:58

اسلام آباد (اُردو پوائنٹ اخبارتازہ ترین - اے پی پی۔ 12 اگست2025ء) چیئرمین سینیٹ کی مشیر مصباح کھر نے بیلجیم کے سفیر چارلس ایدسبالڈ وان ڈیر گراخت ڈی رومرزویل سے ملاقات کی۔ ملاقات میں دوطرفہ پارلیمانی روابط کو مزید فروغ دینے، بین الاقوامی تعاون کے نئے مواقع اور آئندہ عالمی پارلیمانی فورمز میں شمولیت پر تفصیلی تبادلہ خیال کیا گیا۔سینیٹ سیکرٹریٹ سے جاری بیان کے مطابق مصباح کھر نے بیلجیم کے سفیر کو انٹر پارلیمنٹری سپیکرز کانفرنس کے اغراض و مقاصد اور وژن سے آگاہ کیا۔

انہوں نے بتایا کہ یہ ایک نیا اور متحرک عالمی پلیٹ فارم ہے جو دنیا بھر کی پارلیمانوں کے مابین تعاون اور روابط کے فروغ کے لئے تشکیل دیا گیا ہے۔ اس وقت 45 مختلف ممالک کے پارلیمانی سپیکرز اس پلیٹ فارم کا حصہ ہیں۔

(جاری ہے)

انہوں نے بتایا کہ حال ہی میں ملائیشیامیں منعقدہ انتخابات میں چیئرمین سینیٹ سید یوسف رضا گیلانی کو متفقہ طور پر اس تنظیم کا پہلا صدر منتخب کیا گیا جو عالمی پارلیمانی سفارت کاری کے فروغ میں پاکستان کی فعال قیادت کا ثبوت ہے۔

ملاقات میں بیلجیم کے سفیر کو 11 اور 12 نومبر 2025 کو اسلام آباد میں منعقد ہونے والے آئندہ آئی ایس سی اجلاس کی تیاریوں سے بھی آگاہ کیا گیا جس میں کانفرنس کے ایجنڈے، مجوزہ سیشنز، موضوعاتی ترجیحات اور دنیا بھر سے اعلیٰ سطحی وفود کی متوقع شرکت پر تفصیل سے روشنی ڈالی گئی ۔ مصباح کھر نے بیلجیم کے سفیر کو آئی ایس سی کانفرنس کے لئے دعوت نامہ بھی پیش کیا تاکہ ان کے پارلیمانی وفد اس اعلیٰ سطحی کانفرنس میں شرکت کر سکیں۔

مصباح کھر نے اس بات پر زور دیا کہ یہ کانفرنس دنیا کے پارلیمانی رہنماؤں کو ایک ایسا موثر پلیٹ فارم فراہم کرے گی جہاں امن، کثیر الجہتی تعاون اور پائیدار ترقی جیسے اہم عالمی مسائل پر سیر حاصل تبادلہ خیال ہو سکے گا اور مشترکہ چیلنجز سے نمٹنے کے لئے قابلِ عمل حکمت عملیاں تیار کی جا سکیں گی ۔فریقین نے پاکستان اور بیلجیم کے درمیان پارلیمانی تعلقات کو مزید مضبوط بنانے اور عوامی روابط کے فروغ کے عزم کا اعادہ کیا۔