ویسٹ انڈیز نے 34 سال بعد پاکستان کیخلاف سیریز جیت لی

ٹرینیڈاڈ (اردو پوائنٹ تازہ ترین اخبار ۔ 12 اگست 2025ء ) ویسٹ انڈیز نے 34 سال بعد پاکستان کیخلاف سیریز جیت لی۔ تفصیلات کے مطابق ویسٹ انڈیز کیخلاف 3 ایک روزہ میچز کی سیریز کے فیصلہ کن ایک روزہ میچ میں پاکستان کرکٹ ٹیم کو شرمناک شکست، پوری ٹیم صرف 92 رنز پر پویلین لوٹ گئی، 295 رنز کے ہدف کے تعاقب میں پاکستان کا بیٹنگ آرڈر ریت کی دیوار ثابت ہوا۔ سیریز کے آخری ایک روزہ میچ میں ویسٹ انڈیز نے پاکستان کو 295 رنز کا مشکل ہدف دیا، پاکستانی گیند بازوں نے آخری 50 گیندوں پر 100 سے زائد رنز دے ڈالے۔

سیریز کے آخری میچ کا ٹاس پاکستان نے جیت کر پہلے فیلڈنگ کرنے کا فیصلہ کیا تھا۔ آج کے میچ سے قبل پاکستان اور ویسٹ انڈیز کے درمیان تین میچوں کی سیریز ایک ایک سے برابر تھی، پہلے ون ڈے میں پاکستان، دوسرے میں ویسٹ انڈیز کامیاب ہوا۔

(جاری ہے)

جبکہ تیسرے اور فیصلہ کن میچ میں شے ہوپ کی شاندار اور دھواں دار سینچری کی بدولت ویسٹ انڈیز نے پاکستان کو یکطرفہ انداز میں شکست دے کر 34 سال بعد پاکستان کیخلاف ایک روزہ میچز کی سیریز اپنے نام کر لی۔

واضح رہے کہ چئیرمین پی سی بی محسن نقوی کی جانب سے کرکٹ بورڈ میں آمد کے بعد سے پاکستان کی کرکٹ نے زوال کی نئی تاریخ رقم کر دی ہے۔ محسن نقوی کے چئیرمین پی سی بی بننے کے بعد سے پاکستان کرکٹ ٹیم کی شرمناک شکستوں اور شرمناک ریکارڈز بننے کا سلسلہ رکنے کا نام نہیں لے رہا۔ سامنے آنے والے تازہ ترین اعداد و شمار کے مطابق 2024 سے اب تک کھیلے گئے بین الاقوامی ٹی ٹوئنٹی میچز میں پاکستان کرکٹ ٹیم کا دنیا میں سب سے بدترین ریکارڈ رہا ہے۔

پاکستان نے گزشتہ ایک سال کے دوران 63 ٹی ٹوئنٹی میچز کھیلے جن میں سے اسے 38 میں شکست ہوئی۔ گزشتہ ایک سال کے دوران کسی دوسری ٹیم کو اتنے ٹی ٹوئنٹی میچز میں شکست نہیں ہوئی۔ محسن نقوی دور میں پاکستان کرکٹ ٹیم کی شرمناک شکستوں کا ریکارڈ بن چکا ہے۔ محسن نقوی کے چئیرمین پی سی بی بننے کے بعد پاکستان ٹی ٹوئنٹی ورلڈکپ میں امریکا سے شکست کھا چکا، آئرلینڈ کے ہاتھوں بھی پاکستان کو شکست ہو چکی، پاکستان ہوم گراونڈ پر کمزور ویسٹ انڈیز کیخلاف ٹیسٹ سیریز جیتنے میں بھی ناکام رہا، جبکہ ورلڈکپ ٹیسٹ چیمپئن شپ میں پاکستان کو آخری نمبر ملا۔

اس کے علاوہ صرف ایک سال میں پاکستان کو بنگلہ دیش کے ہاتھوں ٹیسٹ سیریز میں وائٹ واش کا سامنا کرنے کے بعد ٹی ٹوئنٹی سیریز میں بھی شکست ہو گئی۔ جبکہ اب ویسٹ انڈیز نے بھی پاکستان کو 34 سال بعد ایک روزہ میچز کی سیریز میں شکست دے دی۔