کرسچن اسٹڈی سینٹر کی پاکستان کے 78 ویں یومِ آزادی کی تقریب، صوبائی وزیر اقلیتی امور رمیش سنگھ اروڑہ کی خصوصی شرکت

بدھ 13 اگست 2025 21:20

لاہور(اُردو پوائنٹ اخبارتازہ ترین - این این آئی۔ 13 اگست2025ء)کرسچن اسٹڈی سینٹر کی جانب سے پاکستان کے 78 ویں یومِ آزادی کی مناسبت سے ایک پُروقار تقریب کا انعقاد کیا گیا، جس میں صوبائی وزیر برائے اقلیتی امور سردار رمیش سنگھ اروڑہ نے خصوصی شرکت کی۔ اس موقع پر پارلیمانی سیکرٹری برائے خصوصی صحت رشدہ لودھی، پارلیمانی سیکرٹری برائے اسکول ایجوکیشن نوشین عدنان اور اسماء احتشام بھی موجود تھیں۔

تقریب میں پروفیسر سید محمود غزنوی، پنڈت بھگت لعل، سہیل احمد رضا سمیت مختلف شعبہ ہائے زندگی سے تعلق رکھنے والی اہم شخصیات شریک تھیں۔ تقریب کی نظامت کرسچن اسٹڈی سینٹر کے کوآرڈینیٹر یاسر نئیر نے کی۔اس موقع پر صوبائی وزیر رمیش سنگھ اروڑہ نے شرکاء کے ہمراہ جشنِ آزادی کا کیک کاٹا اور تمام پاکستانیوں کو یومِ آزادی کی مبارکباد دی۔

(جاری ہے)

اپنے خطاب میں انہوں نے کہا کہ ''پاکستان میں ہر مذہب کے ماننے والے رہتے ہیں، یہ سب کا پاکستان ہے اور سب کو برابر کے حقوق حاصل ہیں۔'' انہوں نے اس بات پر زور دیا کہ پاکستان بھر میں تمام مذہبی اقلیتیں محفوظ ہیں۔رمیش سنگھ اروڑہ نے کہا کہ وزیرِاعلیٰ پنجاب مریم نواز نہ صرف اقلیتوں کے تہواروں میں شریک ہوتی ہیں بلکہ ان کے فلاحی منصوبوں میں بھی بھرپور تعاون فراہم کرتی ہیں۔

انہوں نے بتایا کہ وزیرِاعلیٰ پنجاب نے پچاس ہزار خاندانوں کو مینارٹی کارڈز جاری کیے ہیں تاکہ اقلیتوں کو بہتر سہولیات فراہم کی جا سکیں۔ انہوں نے پاکستان کو ایک ایسے ''گلدستی'' سے تعبیر کیا جس میں تمام مذاہب اور ثقافتیں اپنی خوشبو بکھیرتی ہیں۔تقریب سے پنڈت بھگت لعل اور ریورنڈ امجد نیامت نے بھی خطاب کیا، جبکہ مقررین نے آپسی پیار و محبت کے فروغ اور بین المذاہب ہم آہنگی کی اہمیت پر زور دیا۔ شرکاء نے پاکستان کے 78 ویں یومِ آزادی کو جوش و جذبے اور یکجہتی کے ساتھ منانے کے عزم کا اظہار کیا۔