14 اگست وہ دن ہے جب برصغیر کے مسلمانوں کا خواب پاکستان کی صورت میں حقیقت بنا، شہدا کے اہلِخانہ کا اہل وطن کے نام پیغام

جمعرات 14 اگست 2025 17:33

اسلام آباد(اُردو پوائنٹ اخبارتازہ ترین - این این آئی۔ 14 اگست2025ء)یوم آزادی معرکہ حق کے موقع پر شہداء کے اہلخانہ نے اہل وطن کے نام اپنے پیغام میں کہا ہے کہ14 اگست وہ دن ہے جب برصغیر کے مسلمانوں کا خواب پاکستان کی صورت میں حقیقت بنا،یومِ آزادی محض جشن نہیں بلکہ قربانیوں اور جدوجہد کی عظیم داستان ہے۔لانس نائیک عامر عباس شہید کے بھائی نے یوم آزادی کے موقع پر اپنے پیغام میں کہا کہ 14 اگست وہ دن ہے جب بے مثال قربانیوں اور جدوجہد کے بعد پاکستان آزاد ہوا۔

انہوں نے کہا کہ 14 اگست ہماری آزادی کی یاد، قربانیوں اور ہمت کی داستان ہے،یہ دن ہمارے اسلاف کی قربانیوں اور سپاہیوں کی عظمت کو سلام پیش کرتا ہے۔بھائی لانس نائیک عامر عباس شہید نے کہا کہ یہ دن ہمیں قربانیوں کی یاد اور سرحدوں کے نگہبان سپاہیوں کی عظمت کا پیغام دیتا ہے۔

(جاری ہے)

انہوں نے کہا کہ افواج پاکستان ہر محاذ پر قوم کے دفاع کے لیے سینہ سپر ہے، اسی طرح نائیک ماجد شہید کے بیٹے نے یوم آزادی کے موقع پر کہا کہ کارگل کی بلندیوں سے سیاچن کے برف پوش میدانوں تک ہمارے جوان ہمیشہ سب سے آگے ہیں،جنگ سے لے کر قدرتی آفات تک عوام کی خدمت میں افواج پاکستان ہمیشہ پیش پیش ہیں۔

انہوں نے کہا کہ یوم آزادی پر اپنے ملک سے محبت اور محافظوں کے لیے دعا ہمارا فرض ہے۔مزید برآں نائیک ماجد شہید کی بیٹی نے یوم آزادی کے موقع پر اپنے پیغام میں کہا کہ یوم آزادی پر ان محافظوں کو یاد رکھیں جو آزادی کے لیے جان نچھاور کرتے ہیں،یہ شہیدوں کی قربانیوں کا صلہ ہے کہ آج ہم آزاد فضا میں سانس لے رہے ہیں۔ انہوں نے کہا کہ ہمارا فرض ہے کہ ہم اپنے محافظوں کے لیے دعا کریں جو ہر لمحہ جان قربان کرنے کو تیار ہیں۔ بیٹی نائیک ماجد شہید نے اپنے پیغام میں پاکستان زندہ باد، پاک فوج پائندہ باد کا نعرہ بھی لگایا۔