ڈائریکٹر جنرل تعلقات عامہ محکمہ اطلاعات معزالدین پیزادہ نے 78 ویں جشن آزادی کے موقع پر پرچم کشائی کی

جمعرات 14 اگست 2025 17:36

کراچی (اُردو پوائنٹ اخبارتازہ ترین - این این آئی۔ 14 اگست2025ء)ڈائریکٹر جنرل تعلقات عامہ محکمہ اطلاعات معزالدین پیزادہ اور افسران کے ہمراہ 78ویں جشنِ آزادی و معرکہ حق کے موقع پر محکم اطلاعات کے صدر دفتر میں پرچم کشائی کی اور جشن آزادی کی مناسبت سے کیک کاٹا،آزادی کی78ویں سالگرہ کے موقع پر ڈائریکٹر جنرل تعلقات عامہ محکمہ اطلاعات نے پوری قوم کو مبارک باد پیش کی۔

انہوں نے کہا کہ اس سال جشن آزادی کے ساتھ ساتھ پاک فوج کی بھارت کے خلاف کامیابی کا جشن بھی منایا جا رہا ہے،زندہ قوموں کی نشانی ہے کہ وہ اپنے قومی دن کو یاد رکھتی ہیں۔انہوں نے کہاکہ وطن عزیز کے حصول کے لئے ہمارے بزرگوں نے ان گنت قربانیاں دیں، آزادی ایک نعمت ہے اور ہمیں اللہ تعالی کا شکر ادا کرنا چاہئے کہ اس نے ہمیں ایک آزاد مملکت سے نوازا ہے،ہمیں بابائے قوم کی اصولوں اتحاد ،تنظیم اور یقین محکم پر عمل پیرا ہوکر ملک کو عالمی افق پر نمایاں مقام دلانا ہے۔

(جاری ہے)

انہوں نیکہاکہ محکمہ اطلاعات کو جدید خطوط پر استوار کرنے کے لئے کام کر رہے ہیں۔ڈائریکٹر جنرل تعلقات عامہ محکمہ اطلاعات معزالدین پیزادہ نے کہاکہ آج کے دن عہد کریں کہ اپنے تمام اختلافات کو بھلا کر صوبہ سندھ اور اپنے پیارے وطن پاکستان کی تعمیر و ترقی کے لیے کام کریں۔ ڈائریکٹر جنرل محکمہ اطلاعات سندھ نے کہا کہ آزادی ایک بہت بڑی نعمت ہے جس کا کوئی نعم البدل نہیں اور آزاد معاشرہ ہی ملک کی ترقی کا ضامن ہے۔

اس موقع پر ڈائریکٹر ایڈمن منصور راجپوت،ڈائریکٹرپریس انفارمیشن عبدالماجد خان ،ڈائریکٹر فلمز حزب اللہ میمن، ڈائریکٹر پبلیکیشن امتیازعلی جویو، ڈائریکٹرپریس طارق امام،ڈائریکٹر پلاننگ اینڈ ڈیولپمنٹ محمد عمران ذوالنون،ڈائریکٹر ہیڈ کوارٹر سندھ فدا حسین بالا دی اور دیگر افسران موجود تھے۔ تقریب میں محکمہ اطلاعات کے ڈپٹی ڈائریکٹرزسرور سمیجو ، علیم خان ، سید عمر ہاشمی اور ملازمین نے بھرپور شرکت کی۔