سپریم ایپلٹ کورٹ گلگت بلتستان میں جشنِ آزادی کی پروقار تقریب کا انعقاد

جمعرات 14 اگست 2025 17:20

گلگت (اُردو پوائنٹ اخبارتازہ ترین - اے پی پی۔ 14 اگست2025ء) سپریم ایپلٹ کورٹ گلگت بلتستان میں جشنِ آزادی کے موقع پر ایک پروقار تقریب منعقد ہوئی ،جس کے مہمانِ خصوصی چیف جج سپریم ایپلٹ کورٹ گلگت بلتستان جسٹس سردار شمیم تھے۔ تقریب کا آغاز پرچم کشائی سے ہوا، مہمانِ خصوصی نے پولیس کے چاق و چوبند دستے سے سلامی لی اور ملک و قوم اور شہداء کے لیے خصوصی دعائیں کیں۔

تقریب میں چیف جسٹس چیف کورٹ علی بیگ، چیف کورٹ کے جسٹس صاحبان، چیف الیکشن کمشنر گلگت بلتستان راجہ شہباز، ڈسٹرکٹ اینڈ سیشن ججز، سول کورٹ کے ججز، انسدادِ دہشت گردی کے جج رحمت شاہ، انٹی کرپشن کے سپیشل جج محمود الحسن، وکلاء برادری سمیت خواتین و حضرات کی بڑی تعداد شریک تھی۔خطاب کرتے ہوئے چیف جسٹس سردار شمیم نے قوم کو جشنِ آزادی کی مبارکباد پیش کرتے ہوئے کہا کہ یہ عظیم نعمت بے شمار قربانیوں کے بعد حاصل ہوئی ہے۔

(جاری ہے)

انہوں نے کہا کہ وطنِ عزیز کی تعمیر و ترقی میں ہم سب کو بھرپور کردار ادا کرنا ہوگا، آزادی کی قدر کریں اور یاد رکھیں کہ عدلیہ کی اولین ذمہ داری عوام کو فوری اور سستا انصاف فراہم کرنا ہے۔چیف جسٹس نے گلگت بلتستان کے عوام کو خراجِ تحسین پیش کیا جنہوں نے آزادی حاصل کر کے کلمہ کی بنیاد پر پاکستان کے ساتھ الحاق کیا، اسی لیے گلگت بلتستان کو پاکستان کے ماتھے کا جھومر کہا جاتا ہے۔ انہوں نے میرٹ کی بنیاد پر عدلیہ کے ملازمین کی جلد ترقیوں کی خوشخبری بھی سنائی۔