لاڑکانہ میں یومِ آزادی "معرکۂ حق" کے عنوان سے منایا گیا ، قوم، قیادت اور فوج کو خراجِ تحسین

لاڑکانہ (اُردو پوائنٹ اخبارتازہ ترین - اے پی پی۔ 14 اگست2025ء) ضلع لاڑکانہ میں بھی پاکستان کا 78واں یومِ آزادی ’’معرکۂ حق‘‘ کے عنوان سے منایا گیا۔اس سلسلے میں مرکزی تقریب میونسپل اسٹیڈیم لاڑکانہ میں منعقد ہوئی۔اس موقع پر تقریب کے مہمانِ خصوصی ایم پی اے سہیل انور سیال، وزیرِ اعلیٰ سندھ کے معاونِ خصوصی خیر محمد شیخ،میئر میونسپل کارپوریشن لاڑکانہ ایڈووکیٹ انور علی لہر، چیئرمین ضلعی کونسل لاڑکانہ اعجاز احمد لغاری، کمشنر لاڑکانہ ڈویژن طاہر حسین سانگی، ڈپٹی کمشنر لاڑکانہ وجاہت غفور میرانی،ایس ایس پی لاڑکانہ احمد فیصل چوہدری، ڈپٹی میئر لاڑکانہ محمد امین شیخ اور دیگر نے مل کر پاکستان کا قومی پرچم لہرایا اور قومی ترانہ بھی بجایا گیا۔

سوئیٹ ہوم اور مختلف اسکولوں کے بچوں نے قومی نغموں پر ٹیبلو پیش کیے۔

(جاری ہے)

مہمانِ خصوصی ایم پی اے سہیل انور سیال نے خطاب کرتے ہوئے کہا کہ آج ہم پاکستان کی آزادی کا 78واں سال معرکۂ حق کے عنوان سے منا رہے ہیں۔دشمن نے ہم پر رات کی تاریکی میں حملہ کیا لیکن ہماری پاک فوج نے بہادری سے دشمن کو شکست دی۔ شہید ذوالفقار علی بھٹو نے ملک کو ایٹمی پروگرام دیا اور اپنی جان قربان کر کے اس کی حفاظت کی۔

اسی طرح چیئرمین بلاول بھٹو زرداری نے دنیا کے ہر ملک میں جا کر سفارت کاری کی اور بھارت کو دنیا میں تنہا کر کے پاکستان کی بہادری کا اعتراف کروایا۔ ہماری پاک فوج نے دشمن کو بھرپور شکست دی۔کمشنر لاڑکانہ ڈویژن طاہر حسین سانگی نے کہا کہ ہم آج کا دن یومِ آزادی معرکۂ حق کے طور پر منا رہے ہیں۔ میں آپ سب سے کہنا چاہتا ہوں کہ ہمیں محنت اور جدوجہد کرنی چاہیے تاکہ ہمارا ملک ترقی کرے۔

وزیرِ اعلیٰ سندھ کے معاونِ خصوصی خیر محمد شیخ نے کہا کہ 1947 میں قائداعظم کی قیادت میں پاکستان آزاد ہوا اور آج ہم ایک آزاد قوم کی حیثیت سے زندگی گزار رہے ہیں۔ انہوں نے کہا کہ میں پاک فوج کو سلام پیش کرتا ہوں، شہید ذوالفقار علی بھٹو اور شہید محترمہ بینظیر بھٹو کو بھی سلام پیش کرتا ہوں جنہوں نے ایٹمی پروگرام دیا اور ملک کی ترقی و بہبود کے لیے دن رات کام کیا۔

محترمہ بینظیر بھٹو نے میزائل پروگرام دیا جس کی بدولت آج پاکستان مضبوط ہے۔ میں بلاول بھٹو زرداری کو بھی سلام پیش کرتا ہوں جنہوں نے بہترین سفارت کاری کر کے دنیا کو بتایا کہ ہم امن چاہتے ہیں، ہم پاک فوج کے ساتھ ہیں اور اس ملک کو ترقی دیں گے۔ تقریب میں چیئرمین ضلعی کونسل لاڑکانہ اعجاز احمد لغاری ، میئر میونسپل کارپوریشن لاڑکانہ ایڈووکیٹ انور علی لہر ، ڈپٹی کمشنر لاڑکانہ وجاہت غفور میرانی ، ڈپٹی میئر لاڑکانہ محمد امین شیخ نے بھی خطاب کیا۔

تقریب کے آخر میں ایم پی اے سہیل انور سیال کی جانب سے کمشنر لاڑکانہ ڈویژن طاہر حسین سانگی، ڈپٹی کمشنر لاڑکانہ وجاہت غفور میرانی،چیئرمین ضلعی کونسل لاڑکانہ اعجاز احمد لغاری، میئر لاڑکانہ ایڈووکیٹ انور علی لہر، اسسٹنٹ کمشنر لاڑکانہ راجا دریا خان قریشی، ڈی ای او سیکنڈری اسکول لاڑکانہ گل بہار مگسی،ڈی ای او پرائمری اسکول لاڑکانہ انیس الرحمن جلبانی اور مختلف اداروں کے افسران و ملازمین کو ایوارڈز دیئے گئے۔آخر میں جشنِ آزادی کے موقع پر کیک کاٹا گیا اور پودے بھی لگائے گئے۔