ض*چہلم: سیکیورٹی کے فول پروف انتظامات کیے جائیں، مرکزی تنظیم تاجران پاکستان

جلوسوں اور مجالس میں امن و امان کے تسلسل کو برقرار رکھنا انتظامیہ کی اولین ذمہ داری ہے، صوبائی ترجمان کاشف حیدری و دیگر کا اجلاس سے خطاب ماضی میں اکثر جلوس اور مجالس کے راستوں میں صفائی کے انتظامات ناقص رہے ہیں، صفائی کے انتظامات کو حتمی شکل دی جائے، عزت اللہ کاظمی، محمد علی

جمعرات 14 اگست 2025 18:50

کوئٹہ (اُردو پوائنٹ اخبارتازہ ترین - آن لائن۔ 14 اگست2025ء) مرکزی تنظیم تاجران بلوچستان نے چہلم کے موقع پر فول پروف سیکیورٹی کو یقینی بنانے کا مطالبہ کردیا، مرکزی تنظیم تاجران پاکستان کے صوبائی ترجمان کاشف حیدری، رکن صوبائی کونسل عزت اللہ کاظمی، محمد علی، عبدلاحمد لالا، منظور حسین، علی مدد حیدری، سلیمان علی، مختار علی و دیگر رہنماں نے محمد علی کی رہائشگاہ پر اجلاس سے خطاب کرتے ہوئے کہا ہے کہ چہلم شہدائے کربلا اور حضرت امام حسین علیہ السلام کے مرکزی جلوس کے سلسلے میں سیکیورٹی کے سخت اور فول پروف انتظامات کیے جائیں، جلوس کے راستوں میں صفائی کے انتظامات کو ہر صورت یقینی بنایا جائے اور کسی قسم کی کوتاہی نہ برتی جائے۔

انہوں نے کہا کہ عزاداری امام حسین علیہ السلام ہماری شہ رگِ حیات ہے اور اس موقع پر امن و امان کے تسلسل کو برقرار رکھنا انتظامیہ کی اولین ذمہ داری ہے، اس لیے سیکیورٹی پلان میں کوئی کمزوری نہ چھوڑی جائے۔

(جاری ہے)

انہوں نے کہا کہ ماضی میں اکثر جلوس اور مجالس کے راستوں میں صفائی کے انتظامات ناقص رہے ہیں جس کی وجہ سے شرکا کو مشکلات کا سامنا کرنا پڑا، اس لیے ضروری ہے کہ اس بار صفائی ستھرائی کے مثر اقدامات مکمل کیے جائیں، نکاسی آب کے نظام کو درست رکھا جائے اور کسی بھی جگہ گندگی یا پانی کے جمع ہونے کی شکایت نہ ہو۔

رہنماں نے کہا کہ عزاداران کو پرسکون اور محفوظ ماحول فراہم کرنے کے لیے انتظامیہ اپنی تمام تر صلاحیتیں بروئے کار لائے تاکہ چہلم کا یہ عظیم دن امن و احترام کے ساتھ مکمل ہو۔