مقبوضہ کشمیر :بھارت کے یوم آزادی کے موقع پر پابندیاں مزید سخت

جمعہ 15 اگست 2025 13:32

سرینگر (اُردو پوائنٹ اخبارتازہ ترین - اے پی پی۔ 15 اگست2025ء) غیر قانونی طور پربھارت کے زیر قبضہ جموں و کشمیر میں آج بھارت کے یوم آزادی کے موقع پر پورے مقبوضہ علاقے میں سخت پابندیاں نافذ کر دی گئی ہیں جبکہ تلاشیوں اورگشت کا سلسلہ مزید تیز کردیاگیاہے ۔کشمیر میڈیا سروس کے مطابق قابض حکام نے پورے مقبوضہ جموں و کشمیر بالخصوص سرینگر کوایک فوجی چھانی میں تبدیل کر دیا ہے۔

سرینگر کے بخشی اسٹیڈیم، جہاں یوم جمہوریہ کی مرکزی تقریب منعقد ہو گی، کے گرد سیکورٹی کے سخت اقدمات کئے گئے ہیں ۔ شہر بھر میں اہم مقامات پر رکاوٹیں کھڑی کی گئی ہیں اور گاڑیوں، مسافروں اور راہگیروں کی تلاشیوں کاسلسلہ جاری ہے۔بھارتی فورسز کے اہلکاروں نے کپواڑہ، بانڈی پورہ اور بارہمولہ اضلاع میں بڑے پیمانے پر محاصرے اور تلاشی کی کارروائیاں شروع کر دی ہیں اور متعدد نوجوانوں کو گرفتار کیاگیاہے جس سے لوگوں میں شدید خوف وہراس پھیل گیا ہے۔

(جاری ہے)

قابض حکام نے میڈیا کو بتایا ہے کہ جموں شہر میں پولیس کی کوئیک رسپانس ٹیمیں تعینات کی گئی ہیں اور ہر ضلع کے داخلی اور خارجی مقامات اور اہم شاہراہوں پرگاڑیوں اور مسافروں کی تلاشی لی جارہی ہے ۔انہوں نے کہا کہ سرینگر-جموں ہائی وے اور جموں-پٹھانکوٹ ہائی وے کے ساتھ ساتھ پولیس اور پیراملٹری فورسز کے اہلکاروں کو تعینات کیاگیاہے۔جموں کے تمام 10اضلاع بالخصوص راجوری، پونچھ، کشتواڑ، ڈوڈہ، ادھمپور اور کٹھوعہ میں سخت پابندیاں نافذاور تلاشی کی کارروائیاں جاری ہیں ۔جموں میں یوم آزادی کی مرکزی تقریب مولانا آزاد اسٹیڈیم میں منعقد ہوگی۔تقریب کے مقام کے گرد سکیورٹی کے خصوصی انتظامات کئے گئے ہیں۔