اسٹیٹ بینک کی جانب سے جشنِ معرکہ حق کے موقع پر75 روپے کے یادگاری سکے کا اجرا

جمعہ 15 اگست 2025 17:57

کراچی(اُردو پوائنٹ اخبارتازہ ترین - این این آئی۔ 15 اگست2025ء)وفاقی حکومت نے معرکہ حق میں مسلح افواج کی بہادری کو خراجِ تحسین پیش کرنے اور جشنِ آزادی کے موقع پر 75 روپے کا یادگاری سکہ جاری کردیاہے۔سکہ دھاتی ساخت، شکل اور خصوصیات کا حامل ہے۔مرکزی بینک کے اعلامیئے کے مطابق سکہ دھاتی ساخت،نکل اور پیتل، تانبہ 79 فیصد، زنک 20 فیصد اور نکل ایک فیصدہے جبکہ سکے کا قطر 30ملی میٹر،وزن13.5گرام ہے۔

سکے کے سامنے کے رخ پر وسط میں بڑھتا ہوا ہلال اور پانچ نوکوں کا ابھرتا ہوا ستارہ ہے، جس کا رخ شمال مغرب کی طرف ہے۔ ستارے اور ہلال کے اوپر سکے کے کنارے کے ساتھ ساتھ اردو میں اسلامی جمہوریہ پاکستان کے الفاظ کندہ ہیں۔ چاند کے نیچے اور گندم کی اوپر کی طرف خمیدہ دو بالیوں کے اوپرعددی صورت میں اجرا کا سال 2025 درج ہے۔

(جاری ہے)

ستارے اور ہلال کے دائیں اور بائیں جانب بالترتیب سکے کی مالیت جلی اعداد میں 75 اور اردو رسم الخط میں روپیہ تحریر ہے۔

پچھلے رخ پر وسط میں اردو میں معرکہ حق اور ہندسوں میں 2025 کے الفاظ درج ہیں۔سکے کے بالائی کناروں پر اردو میں پاکستان ہمیشہ زندہ باد رقم ہے۔سکے کے پچھلے رخ پر(دائیں اور بائیں جانب )دو لڑاکا طیارے، بحری جہاز، ملٹی پل راکٹ لانچر سسٹم ابھرے ہوئے دکھائی دیتے ہیں۔مذکورہ سکہ اسٹیٹ بینک بینکنگ سروسز کارپوریشن کے فیلڈ دفاتر کے ایکسچینج کائونٹرزپر15اگست 2025 سے دستیاب ہے ۔