ابوظہبی،پاکستانی سفیر فیصل نیاز ترمذی کا سیلاب متاثرین سے اظہار ہمدردی، یومِ آزادی کی تقریبات ملتوی

اتوار 17 اگست 2025 22:00

ابوظہبی(اُردو پوائنٹ اخبارتازہ ترین - این این آئی۔ 17 اگست2025ء)متحدہ عرب امارات میں پاکستان کے سفیر فیصل نیاز ترمذی نے حالیہ سیلاب کے باعث پاکستان کے مختلف علاقوں بشمول خیبر پختونخوا کے اضلاع بونیر ،سوات ، باجوڑ، شانگلہ، مانسہرہ و دیگر علاقوں اور کشمیر و گلگت بلتستان میں قیمتی جانوں اور گھروں کے ضیاع پر گہرے دکھ اور افسوس کا اظہار کیا ہے۔

(جاری ہے)

سفارت خانہ کی جانب سے جاری بیان میں انہوں نے کہاکہ یہ المیہ نہ صرف متاثرہ خاندانوں بلکہ پوری قوم کیلئے ایک کڑا امتحان ہے۔ پاکستانی سفیر نے متحدہ عرب امارت میں بسنے والی پاکستانی کمیونٹی سے اپیل کی کہ دکھ کی اس گھڑی میں ہم وطنوں کے ساتھ کھڑے ہوں، غم بانٹیں اور ہر ممکن تعاون کریں۔ انہوں نے کہا کہ اس افسوسناک سانحے کے پیشِ نظر متاثرہ خاندانوں کے ساتھ یکجہتی کا اظہار کرتے ہوئے متحدہ عرب امارت میں منعقدہ یومِ آزادی کی تقریبات ملتوی کردی گئی ہیں۔انہوں نے دعا کی کہ اللہ تعالی مرحومین کی مغفرت فرمائے اور لواحقین کو صبر جمیل عطا کرے۔آمین