پاک فوج، صوبائی اور وفاقی حکومت نے سیلاب متاثرین کی مدد کے لیے بہترین کام کیا ،مزید امدادی اقدامات کی ضرورت ہے،بیرسٹر گوہر

بدھ 20 اگست 2025 19:42

پشاور (اُردو پوائنٹ اخبارتازہ ترین - اے پی پی۔ 20 اگست2025ء) چیئرمین پاکستان تحریک انصاف بیرسٹر گوہر علی خان نے کہا ہے کہ خیبرپختونخوا حالیہ سیلاب سے بری طرح متاثر ہوا ہے اور متعدد علاقے تاحال مشکلات کا شکار ہیں۔

(جاری ہے)

میڈیا سے گفتگو کرتے ہوئے انھوں نے کہا ہے کہ پاک فوج، صوبائی اور وفاقی حکومت نے متاثرین کی مدد کے لیے بہترین کام کیا ہے اور ہم ان کے شکر گزار ہیں، تاہم عوام کی مشکلات اتنی زیادہ ہیں کہ مزید امدادی اقدامات کی ضرورت ہے۔

بیرسٹر گوہر نے بتایا کہ بونیر میں 100 سے زائد افراد اب بھی لاپتہ ہیں جبکہ وہاں آباد اقلیتی برادری کے گھروں کو بھی شدید نقصان پہنچا ہے، عوام سے اپیل ہے کہ وہ دل کھول کر سیلاب متاثرین کی امداد کریں تاکہ مشکل کی اس گھڑی میں متاثرہ خاندانوں کو سہارا دیا جا سکے۔