ژ*انسپکٹر کے عہدے پر ترقی پانیوالے 60 افسران کو پروموشن رینک لگانے کی تقریب

آئی جی پنجاب ڈاکٹر عثمان انور نے پروموٹ ہونے والے لاہور پولیس کے افسران کو انسپکٹر عہدے کے رینک لگائے اگلے سال تک پنجاب کے تمام شہروں، تحصیلوں، یونین کونسلز کو سیف سٹی ٹیکنالوجی پر منتقل کر دیں گے، آئی جی پنجاب

بدھ 20 اگست 2025 21:10

آ*لاہور (اُردو پوائنٹ اخبارتازہ ترین - آن لائن۔ 20 اگست2025ء) انسپکٹر جنرل پولیس پنجاب ڈاکٹر عثمان انور کی ہدایت پر سب انسپکٹر سے انسپکٹر عہدے پر ترقی پانے والے 60 افسران کو رینک لگانے کی تقریب سنٹرل پولیس آفس میں منعقد کی گئی۔ آئی جی پنجاب نے پروموٹ ہونے والے لاہور پولیس کے افسران کو انسپکٹر عہدے کے رینک لگائے۔اس موقع پر آئی جی پنجاب نے کہا کہ پنجاب پولیس کی تاریخ کا سب سے بڑے پروموشن بورڈ میں 406 سب انسپکٹرز کو ترقی دی گئی۔

وزیر اعلیٰ پنجاب مریم نواز کے نئے پولیس یونٹس کے قیام سے ہزاروں نئی آسامیاں اور پروموشنز ممکن ہوئیں۔ حکومت پنجاب نے پولیس ہیومن ریسورس، سیف سٹیز، لاجسٹکس اور ٹرانسپورٹ کے لئے اربوں روپے فراہم کئے ہیں۔ امن کے قیام اور جرائم پیشہ عناصر کی سرکوبی کے لئے پنجاب پولیس کی بھرپور سرپرستی پر وزیر اعلیٰ پنجاب کے شکر گزار ہیں۔

(جاری ہے)

سی سی ڈی، رائٹ مینجمنٹ پولیس کے بعد ٹورازم، سائبر پولیس ونگز کے ذریعے مزید سینکڑوں آسامیاں اور پروموشنز ہونگی۔

ٹرائی باڈر ایریاز، کچے میں دہشت گردوں اور شرپسندوں کے حملوں سے حفاظت کیلئے وہیکلز بلٹ پروفنگ کا عمل جاری ہے۔ اگلے سال تک پنجاب کے تمام شہروں، تحصیلوں اور یونین کونسلز کو سیف سٹی ٹیکنالوجی پر منتقل کر دیں گے۔ ترقی پانیوالے افسران کے اہل خانہ نے بڑی تعداد میں تقریب میں شرکت کی۔ آئی جی پنجاب نے ترقی پانے والے افسران اور ان کے اہل خانہ کو مبارکباد دی۔

آئی جی پنجاب نے کہا کہ تمام پروموشنز، ویلفیئر اقدامات کے بدلے میں پاکستان کی بے خوف حفاظت اورپاکستانیوں کی بے لوث خدمت یقینی بنائیں۔ ایڈیشنل آئی جی پنجاب سلطان احمد چوہدری، ڈی آئی جی اسٹیبلشمنٹ ون سلیمان سلطان رانا، ڈی آئی جی اسٹیبلشمنٹ ٹو کیپٹن (ر) لیاقت علی ملک، کمانڈنٹ پولیس ٹریننگ کالج ملتان اور سینئر افسران نے تقریب میں شرکت کی