ریجنل ہیڈ وفاقی محتسب سرگودھا کی فیسکو آفس میانوالی میں کھلی کچہری

جمعرات 21 اگست 2025 17:44

سرگودھا (اُردو پوائنٹ اخبارتازہ ترین - اے پی پی۔ 21 اگست2025ء) وفاقی محتسب اعلیٰ اعجاز احمد قریشی کی ہدایت پر ریجنل ہیڈ وفاقی محتسب سیکرٹریٹ سرگودھا خواجہ سیف الرحمان نے جمعرات کو ایکسین فیسکو آفس میانوالی میں کھلی کچہری کا انعقاد کیا جس میں وفاقی اداروں کے خلاف شکایات کی سماعت کی گئی۔ وفاقی اداروں کی بدانتظامی کے خلاف 26 سے ذیادہ شکایات کنندگان کی بجلی،پوسٹل لائف انشورنس کمپنی،نادرا، پاکستان بیت المال، نیشنل بنک آف پاکستان، پاسپورٹ آفس، پاکستان بینوویلنٹ فنڈ ، ایپلائیز اولڈ ایج بینفٹ انسٹیٹیوٹ اور چشمہ واپڈا پروجیکٹ کے خلاف شکایات پیش کیں۔

موقع پر اُن کی جائز شکایات کا ازالہ کیا گیا جبکہ 26 نئی شکایات وصول کیں ۔ جن وفاقی اداروں کے خلاف شکایات کا فیصلہ ہوا ان کو موقع پر ازالہ کرنے کی ہدایات جاری کی گئی۔

(جاری ہے)

ریجنل ہیڈ وفاقی محتسب سیکرٹریٹ سرگودھا خواجہ سیف الرحمان نے کھلی کچہری میں موجود افراد کو آگاہ کیا کہ وہ وفاقی اداروں میں بدانتظامی کے خلاف صرف سادہ کاغذ پر اپنی شکایت تحریر کریں۔

اس کے ساتھ اپنی شناختی کارڈ کی کاپی لگائیں، اپنا موبائل نمبر لکھیں اوراس کو وفاقی محتسب کی ویب سائیٹ پر یا وٹس ایپ پر یا ای میل کے ذریعے یا مروجہ ڈاک کے ذریعہ وفاقی محتسب کے ریجنل آفس سرگودھا بھیج دیں۔ انہوں نے کہا کہ صرف اس بات کا خیال رکھا جائے کہ آپ نے اپنے معاملہ کے حل کیلئے کسی عدالت میں رجوع نہ کیا ہو اور یہ کہ آپ کا معاملہ زیرِ سماعت نہیں ہے۔ اس کے علاوہ وزرات دفاع یا ملکی خارجہ امور کے متعلق نہ ہو۔ انہوں نے بتایا کہ آپ کی شکایت پر 30 دن کے اندر فیصلہ کر دیا جاتا ہے۔ اُنہوں نے میانوالی کی عوام کو آگاہ کیا کہ وہ وفاقی محتسب کی خدمات سے بھر پور فائدہ اُٹھائیں اور فوری اورسستے انصاف کے لیے حکومت کی اس سہولت سے فائدہ اُٹھائیں۔