مون سون بارشوں سے نقصانات، وزیراعظم آزاد کشمیر کی زیر صدارت جائزہ اجلاس

مظفرآباد (اُردو پوائنٹ اخبارتازہ ترین - این این آئی۔ 21 اگست2025ء)وزیراعظم آزادکشمیر چوہدری انوارالحق نے وفاقی وزیر آبی وسائل میاں معین وٹو کے ہمراہ مون سون کے دوران آزاد کشمیر میں ہونے والے نقصانات کا جائزہ لینے بارے اعلی سطح اجلاس کی صدارت کی۔ اجلاس میں موسٹ سینئر وزیر کرنل(ر) وقار احمد نور، وزراء حکومت حکومت فیصل ممتاز راٹھور،میاں عبدالوحید ایڈووکیٹ، عبدالماجد خان، چوہدری اظہر صادق، دیوان علی خان چغتائی، نثار انصر ابدالی، سردار جاوید ایوب، راجہ محمد صدیق، محترمہ تقدیس گیلانی، چیف سیکرٹری آزاد کشمیر خوشحال خان، انسپکٹر جنرل پولیس آزادکشمیر رانا عبد الجبار، سیکرٹری مالیات اسلام زیب، سیکرٹری شاہرات و تعمیرات عامہ ظفر محمود خان، سیکرٹری سٹیٹ ڈیزاسٹرمنجمنٹ اتھارٹی چوہدری محمد فرید، سیکرٹری پی ڈی او و برقیات ارشاد قریشی، کمشنر مظفرآباد ڈویژن چوہدری گفتار حسین، ڈی آئی جی مظفرآباد ریجن یاسین قریشی و دیگر نے شرکت کی۔

(جاری ہے)

اجلاس میں آزاد کشمیر میں مون سون کے دوران ہونے والے نقصانات کا تفصیلی جائزہ لیا گیا۔ سیکرٹری سٹیٹ ڈیزاسٹر مینجمنٹ اتھارٹی نیحکومت آزاد کشمیر کی جانب سے متاثرین کی فوری بحالی کیلئے امدادی سرگرمیوں اورمجموعی نقصانات، سیکرٹری شاہرات نے مون سون کے دوران محکمہ شاہرات کے تباہ ہونے والی سڑکات اور پل ہاء بارے جبکہ سیکرٹری پی ڈی او نے مون سون کی بارشوں کے نتیجے میں تباہ شدہ پاور ہاوسز، انفراسٹرکچر پر بریفنگ دی۔

اس موقع پر وزیراعظم چوہدری انوار الحق نے کہا کہ رواں سال مون سون کے دوران ہونے والی تباہ کاریوں کی آزاد کشمیر کی تاریخ میں مثال نہیں ملتی، حالیہ تباہ کاریوں سے انفراسٹرکچر بری طرح متاثر ہوا ہے، حکومت آزاد کشمیر نے آپریشن بنیان مرصوص اور مون سون کے دوران شہریوں کو محفوظ بنانے اور متاثرین کی بحالی کیلئے فوری امدادی سرگرمیوں کیلئے مثالی کام کیا، حکومت رواں مالی سال کے متاثرہ جاری منصوبہ جات کی تعمیر نو ذاتی اے ڈی پی سے کرے گی، تاہم پہلے سے تعمیر کردہ انفراسٹرکچر کیلئے فیڈرل گرانٹ کی ضرورت ہے۔

اس موقع پر گفتگو کرتے ہوئے وفاقی وزیر آبی وسائل میاں معین وٹو نے کہا کہ وزیراعظم پاکستان میاں محمد شہباز شریف آزاد کشمیر کے متاثرہ علاقوں کی تعمیر نو میں ذاتی طور پر دلچسپی لے رہے ہیں اور مجھے نقصانات کا جائزہ لینے کیلئے خصوصی ہدایات دے کر بھیجا ہے، حکومت پاکستان اور پاکستانی عوام آزاد کشمیر کی ترقی اور خوشحالی کے خواہاں ہیں، انفراسٹرکچر کی تعمیر نو کے لیے وفاقی حکومت کو فوری تخمینہ لاگت مرتب کر کے رپورٹ پیش کی جائے تاکہ بحالی کا آغاز کیا جاسکے۔

مون سون کے دوران تباہ شدہ انفراسٹرکچر سمیت متاثرین کی بحالی کیلئے وفاقی حکومت مکمل تعاون کرے گی۔ قبل ازیں بریفنگ میں بتایا گیا کہ آزاد کشمیر میں محکمہ شاہرات، لوکل گورنمنٹ، تعلیم، صحت، پاور ڈویلپمنٹ آرگنائزیشن، آب پاشی اور فزیکل پلاننگ کے منصوبے بری طرح متاثر ہوئے ان میں سڑکیں، پل ہا، واٹر سپلائی سکیمز، تعلیمی اداروں کی عمارات، اریگیشن چینلز، صحت مراکز و دیگر منصوبہ جات شامل ہیں۔ آخر میں مون سون کے دوران جاں بحق افراد کے ایصال ثواب کیلئے فاتحہ خوانی کی گئی۔