ڈویژنل سپرنٹنڈنٹ ریلوے کا لاہور تا ساہیوال سیکشن پرریلوے ٹریک وتنصیبات کا معائنہ

جمعرات 21 اگست 2025 21:00

لاہور (اُردو پوائنٹ اخبارتازہ ترین - اے پی پی۔ 21 اگست2025ء) ڈویژنل سپرنٹنڈنٹ ریلوے لاہور انعام اللہ نے لاہور تا ساہیوال سیکشن پر ریلوے ٹریک اور تنصیبات کا تفصیلی معائنہ کیا۔انہوں نے یہ معائنہ خیبر میل، عوام ایکسپریس اور موٹر ٹرالی کے ذریعے کیا تاکہ ٹرین آپریشن کو مزید محفوظ اور موثر بنایا جا سکے۔ترجمان کے مطابق ڈی ایس ریلوے لاہور نے خیبر میل کے ذریعے لاہور سے ساہیوال تک فٹ پلیٹ انسپیکشن کی اور ساہیوال سے رائیونڈ تک عوام ایکسپریس کے ذریعے ٹریک کا معائنہ کیا۔

بعد ازاں رائیونڈ سے لاہور واپسی پر موٹر ٹرالی کے ذریعے ٹریک کی باریک بینی سے جانچ پڑتال کی گئی۔انسپیکشن کے دوران ڈپٹی ڈی ایس مکینیکل میاں عبدالوقاص، ڈویژنل ایگزیکٹو انجینئر غلام مرتضی اور ڈویژنل سگنل اینڈ ٹیلی کام انجینئر محمد ندیم خٹک بھی ڈی ایس ریلوے کے ہمراہ تھے۔

(جاری ہے)

ڈی ایس ریلوے نے ٹریک کی الائنمنٹ، بیلنس، کروز (Curves)، سگنلنگ سسٹم، لیول کراسنگ گیٹس اور دیگر ریلوے تنصیبات کا جائزہ لیا اور موقع پر موجود افسران کو ضروری ہدایات دیں۔

اس موقع پر ڈی ایس ریلوے لاہور انعام اللہ نے کہا کہسیفٹی رولز پر کسی قسم کا سمجھوتہ نہیں کیا جائے گا، پاکستان ریلوے مسافروں کو محفوظ اور آرام دہ سفری سہولیات فراہم کرنے کے لیے ہر ممکن اقدامات جاری رکھے ہوئے ہے۔علاوہ ازیں ڈی ایس ریلوے کی ہدایت پر ڈپٹی ڈی ایس مکینیکل میاں عبدالوقاص نے عوام ایکسپریس میں ٹکٹ چیکنگ کے دوران 22 بغیر ٹکٹ مسافروں سے کرایہ اور جرمانہ کی مد میں 11,640 روپے وصول کرکے سرکاری خزانے میں جمع کروا دیئے۔