وزیراعظم سے چینی وزیرخارجہ کی ملاقات،سی پیک فیزٹو پر اطمینان کااظہار

ملاقات میں فیلڈ مارشل عاصم منیر، ڈپٹی وزیر اعظم اسحق ڈار، کابینہ کے سینئر ارکان موجود تھے پاکستان کی خود مختاری اور قومی ترقی میں چین کے کردار کو سراہتے ہیں،شہبازشریف کی گفتگو

جمعرات 21 اگست 2025 23:05

اسلام آباد(اُردو پوائنٹ اخبارتازہ ترین - این این آئی۔ 21 اگست2025ء)وزیراعظم شہباز شریف نے کہا ہے کہ پاکستان کی خود مختاری اور قومی ترقی میں چین کے کردار کو سراہتے ہیں۔یہ بات وزیراعظم شہباز شریف نے چین کے وزیر خارجہ وانگ ای سے وزیراعظم ہاوس میں ملاقات کے دوران کہی۔ملاقات میں آرمی چیف فیلڈ مارشل عاصم منیر، ڈپٹی وزیر اعظم اسحاق ڈار، کابینہ کے سینئر ارکان بھی موجود تھے۔

وزیراعظم شہباز شریف نے چینی وزیرِ خارجہ سے گفتگو کرتے ہوئے کہا کہ چین کے ساتھ اسٹریٹیجک تعاون پر مبنی شراکت داری مزید مضبوط کریں گے۔وزیراعظم نے پاکستان کی خودمختاری و علاقائی سالمیت پر حمایت پر چینی حکومت کا شکریہ ادا کیا اور چینی صدر شی جن پنگ کی قیادت کو خراج تحسین پیش کیا۔انہوں نے کہا کہ آئندہ دورہ بیجنگ اور تیانجن کا شدت سے منتظر ہوں، دورے میں ایس سی او سربراہی اجلاس اور جنگ عظیم دوم کی 80ویں سالگرہ کی تقریبات میں شرکت کروں گا۔

(جاری ہے)

وزیراعظم شہباز شریف نے کہا کہ پاکستان تجارت، سرمایہ کاری، آئی سی ٹی، زراعت اور معدنیات میں چین سے تعاون بڑھانا چاہتا ہے، سی پیک پاکستان کی سماجی و معاشی ترقی اور خطے کی کنیکٹیوٹی کے لیے کلیدی اہمیت رکھتا ہے۔اس موقع پر چینی وزیر خارجہ وانگ ای نے کہا کہ پاکستان ہمارا آہنی دوست اور ہر موسم کا اسٹریٹیجک پارٹنر ہے، چین پاکستان کی خودمختاری اور علاقائی سالمیت کے دفاع کے عزم کو سراہتا ہے۔انہوں نے کہا کہ چین پاکستان سے مل کر علاقائی امن، ترقی اور استحکام کے لیے کام کرتا رہے گا۔وزیر اعظم آفس کے مطابق ملاقات میں وزیر اعظم شہباز شریف نے سی پیک فیز ٹو کی مسلسل پیش رفت پر اطمینان کا اظہار بھی کیا۔