روس کا یوکرین پر بڑا فضائی حملہ، 574 ڈرون اور 40 میزائل داغے گئے

577 کو یوکرینی فضائیہ نے مار گرایا، ایک شخص ہلاک اور 15 زخمی ہوئے،حکام

جمعہ 22 اگست 2025 17:42

کیف(اُردو پوائنٹ اخبارتازہ ترین - این این آئی۔ 22 اگست2025ء) یوکرینی حکام نے دعویٰ کیا ہے کہ روس نے یوکرین پر 574 ڈرون اور 40 میزائل داغے جو حالیہ ہفتوں کے سب سے بڑے حملوں میں سے ایک ہیں۔ اس حملے میں ایک شخص ہلاک اور 15 زخمی ہوئے۔

(جاری ہے)

برطانوی نشریاتی ادارے کے مطابق روس کی جانب سے 614 ڈرون اور میزائل فائر کیے گئے جن میں سے 577 کو یوکرینی فضائیہ نے مار گرایا۔ یہ جولائی کے بعد سب سے بڑا فضائی حملہ قرار دیا جا رہا ہے۔یہ حملے ایسے وقت میں ہوئے ہیں جب امریکی صدر ڈونلڈ ٹرمپ روس اور یوکرین جنگ ختم کرانے کے لیے سفارتی کوششوں کی قیادت کر رہے ہیں۔ یوکرینی صدر ولودیمیر زیلنسکی نے کہا کہ وہ روسی صدر پیوٹن سے کسی غیر جانبدار یورپی ملک، جیسے سوئٹزرلینڈ یا آسٹریا میں ملاقات کے لیے تیار ہیں۔