سندھ خواتین کوبااختیار بنانے میں سرفہرست،سفری سہولت کیلئے ورکرز ویلفیئر بورڈ کے 10 ہزار مفت الیکٹرک موٹر سائیکل منصوبے کاآغاز

جمعہ 22 اگست 2025 18:33

کراچی (اُردو پوائنٹ اخبارتازہ ترین - این این آئی۔ 22 اگست2025ء)سندھ حکومت نے خواتین کو بااختیار بنانے اور انہیں آسان ومحفوظ سفری سہولت فراہم کرنے کے لیے ورکرز ویلفیئر بورڈ کے تحت10 ہزارمفت الیکٹرک موٹر سائیکلوں کے گرینڈ منصوبے کا آغاز کردیا ہے۔ وزیر محنت سندھ شاہد تھہیم نے اعلان کیا ہے کہ الیکٹرک موٹر سائیکل کے حصول کیلئے رجسٹریشن کا عمل شروع کردیاہے۔

خواتین درخواستیں ورکرز ویلفیئر بورڈ کی آفیشل ویب سائٹ پر جمع کرا سکتی ہیں جبکہ ریکارڈ بھی آن لائن چیک کیا جا سکتا ہے۔ وزیرمحنت شاہدتھہیم نے بتایا کہ قرعہ اندازی مکمل طور پر ڈیجیٹل نظام کے تحت ہوگی جس میں انسانی مداخلت کا کوئی امکان نہیں۔ اسکیم کے تحت 20 سے 45 سال کی خواتین صنعتی مزدور درخواست دینے کی اہل ہیں جبکہ 20 فیصد کوٹہ اقلیتی برادری کے لیے مختص ہے۔

(جاری ہے)

موٹر سائیکل سات سال کے لیے لازمی طور پر رکھنی ہوگی اور ڈرائیونگ لائسنس کے حصول کے لیے 60 دن کی مہلت دی جائے گی۔ وزیر محنت نے اس عزم کا اظہار کیا کہ خواتین آبادی کا نصف سے زیادہ حصہ ہیں اور ان کی ترقی کے بغیر ملک کی ترقی ممکن نہیں۔ اسی سوچ کے تحت یہ منصوبہ شروع کیا ہے۔ منصوبے کا مقصد خواتین کو محفوظ اور باوقار سفری سہولت فراہم کرنا، روزمرہ اخراجات میں کمی لانا اور ماحول دوست ٹیکنالوجی کو فروغ دینا ہے۔

اقلیتوں کے حوالے سے وزیر محنت شاہد تھہیم نے کہا کہ پاکستان کے پرچم میں سفید رنگ ان کے مساوی حقوق اور قربانیوں کی علامت ہے۔ اس اسکیم میں ان کا شمار دراصل ان قربانیوں کا اعتراف ہے جو انہوں نے ملک کی تعمیر و ترقی میں دی ہیں۔ یہ منصوبہ چیئرمین بلاول بھٹو زرداری کی وژنری قیادت کی روشن مثال ہے۔ یہ صرف ٹرانسپورٹ کی سہولت نہیں بلکہ خواتین اور اقلیتوں کی شمولیت، مساوات اور خودمختاری کی جانب ایک خاموش انقلاب ہے جس پر سندھ حکومت فخر کرتی ہے۔